ހެލްތް ޕްރޮޓެކްޝަން އެޖެންސީ އާއި ޓުއަރިޒަމް މިނިސްޓްރީން ނެރެފައިވާ އުސޫލުތަކާއި ހިލާފުވި އިތުރު ގެސްޓްހައުސްއެއްގެ ހުއްދަ ބާތިލްކޮށްފިއެވެ.
މިއާއެކު ގައިޑްލައިން އާއި ހިލާފުވެގެން މާލެ ސަރަހައްދުން ހުއްދަ ބާތިލް ކުރި ގެސްޓްހައުސްގެ އަދަދު ވަނީ 4 އަކަށް އަރާފައެވެ. ގައިޑްލައިން އާއި ހިލާފުވެގެން ހޮނިހިރު ދުވަހުވެސް ޓުއަރިޒަމް މިނިސްޓްރީން ވަނީ ތިން ގެސްޓް ހައުސްއެއްގެ ހުއްދަ ބާތިލްކޮށްފައެވެ.
މީގެ އިތުރުން ހޮނިހިރު ދުވަހު ވަނީ 3 ގެސްތްހައުސްއަކަށް ކަންކަން ރަނގަޅުކުރުމަށް އިންޒާރުވެސް ދީފައެވެ. އެ އޮތޯރިޓީގެ ގައިޑްލައިންގައިވާ ގޮތުން، ޓްރާންސިޓް ހާލަތުގައި ފިޔަވައި މާލެ ސަރަހައްދުގެ ގެސްޓު ހައުސްތަކުގައި 48 ގަޑިއިރަށް ވުރެ ގިނަ އިރަށް ދެކުނު އޭޝިއާގެ ފަތުރުވެރިންނަށް ނުތިބެވޭނެއެވެ. އަދި ރާއްޖޭގެ އެއްވެސް ރަށެއްގެ ގެސްޓްހައުސްއެއްގައި މިވަގުތަށް ދެކުނު އޭޝިއާ ފަތުރުވެރިން ބޭތިއްބުމަކީ މަނާކަމެއް ކަމަށް އެޗްޕީއޭއިން ވަނީ ކަނޑައަޅާފައެވެ.
ޓުއަރިޒަމް މިނިސްޓްރީން ވަނީ މާލެ ސަރަހައްދުގައި ހިންގާ ގެސްޓް ހައުސްތަކުގެ އިސްޕެކްޝަނެއް ފަށާފައެވެ. ފިޔަވަޅުތައް އަޅަމުން ގެންދަނީ މިނިސްޓްރީގެ ޓީމްތަކުން ތަންތަނަށް ގޮސް ބެލުމަށްފަހުއެވެ.
