ދެންވެސް ގައުމު ސަލާމަތް ކުރެވޭނީ ކުރީގެ ރައީސް އަބްދުﷲ ޔާމީން އަބްދުލް ގައްޔޫމަށް ކަމަށް ގުރައިދޫ ދާއިރާގެ މެމްބަރު މުހައްމަދު ޣައްސާން މައުމޫނު ވިދާޅުވެއްޖެއެވެ.
ޣައްސާން ކުރެއްވި ޓުވީޓެއްގައި ވިދާޅުވެފައިވަނީ، މާލެ ސަރަހައްދު އަދި މުޅި ރާއްޖޭގެ ތަރައްގީއަށް ރައީސް ޔާމީން ރާއްވަވާފައި ހުރީ ވަށާޖެހޭ ރައްޔިތުންނަށް ފައިދާ ކުރާ ދައުލަތުގެ ރައުސުލްމާލު އިތުރުވެ ދިވެހި ގައުމު ފުރިހަމަ މިނިވަން ކަމާއެކު އަމިއްލަ ފައިމައްޗަށް ތެދުވުމުގެ އަމާޒު ހިފޭ މަޝްރޫއުތައް ކަމަށެވެ.
ޣައްސާން މިފަދައިން ޓުވީޓް ކުރައްވާފައި މިވަނީ މާލެ އާއި ހުޅުމާލޭގެ ކަރަންޓު އެއް ވިއުގައަކުން ގުޅާލަން ކުރީގެ ރައީސް އަބްދުﷲ ޔާމީން އަބްދުލްގައްޔޫމް ފެއްޓެވި މަސައްކަތް ނިމިފައިވާ ކަމަށް ސްޓެލްކޯއިން ހާމަކުރުމުންނެވެ. ގްރޭޓާމާލޭ ގްރިޑް ކަނެކްޝަނަކީ މާލެއާއި، ހުޅުމާލެ އަދި ހުޅުލޭގެ ކަރަންޓު ވިއުގަ 132ކޭވީ ގެ ހަތް ކިލޯމީޓަރުގެ ދެ ސާކިޓްއިން ގުޅާލެވޭ މަޝްރޫއެކެވެ. މި ކަރަންޓުވިއުގައިން ކޮންމެ ސާކިޓަކުން 100 މެގަވޮޓްގެ ހަކަތަ ފޮނުވުމުގެ ގާބިލްކަން ލިބިގެންދާނެކަން ފާހަގަ ކޮށްލެވެއެވެ. އަދި މި މަޝްރޫގެ ދަށުން ހުޅުމާލެ އަދި މާލޭގައި 95 އެމްވީއޭގެ ޖުމްލަ ހަތަރު ޓްރާންސްފޯމަރާއި، ހުޅުލޭގައި އަށް އެމްވީއޭގެ ދެ ޓްރާންސްފޯމަރު ބަހައްޓާފައިވާއިރު، މިއީ ކުރީގެ ރައީސް ޔާމީން ތަރައްގީ ކުރެއްވި ބުރިޖާއިއެކު، އެމަނިކުފާނު ފެއްޓެވި މަސައްކަތެކެވެ.
