ކުރީގެ ޓެކްނޮލިޖީ މިނިސްޓަރ މުހައްމަދު މަލީހު ޖަމާލް، ތުލުސްދޫ ދާއިރާގެ ކުރީގެ މެމްބަރު މުހައްމަދު ވަހީދު އިބްރާހިމް (ވައްޑެ) އަދި ކުރީގެ މެމްބަރު ރުކުމާ އަބުދުލް ކަރީމް ވެސް ޕީޕީއެމްއަށް ސޮއިކޮށްފިއެވެ.
ޕީޕީއެމްއާ ގުޅުމަށްފަހު ވާހަކަ ދައްކަވަމުން މަލީހު ވިދާޅުވީ، ޕީޕީއެމްއާއި ގުޅުނީ ސިޔާސީ ގޮތުން ހުއްޓި ނުހުންނަން ވެގެން ކަމަށާއި ގައުމަށް ރަނގަޅު ގޮތެއް އެދިގެން މަސައްކަތް ކުރާ ޕާޓީއަކީ ޕީޕީއެމް ކަމަށްވާތީ ކަމަށެވެ. އަދި މަލީހު ވަނީ ގައުމަށް ހެޔޮއެދޭ އެންމެހާ ފަރާތްތަކުންވެސް ޕީޕީއެމްއަށް ގުޅުމަށް ގޮވާލައްވާފައެވެ.
ޕީޕީއެމްއާއި ގުޅުމަށްފަހު ވާހަކަދައްކަވަމުން ރުކުމާ ވިދާޅުވީ، ޕީޕީއެމްއާއި ގުޅުމަށް ނިންމީ ގިނަ މަސްވެރިންނާއި ދަނޑުވެރިންވެސް އެކަމަށް ބޭނުންވެގެން އެދެމުންދާތީ ކަމަށެވެ.
ޕީޕީއެމްއަށް ސޮއިކުރުމަށްފަހު ވައްޑެ ވިދަޅުވީ، ގައުމަށް އެންމެ ބޭނުންތެރި ރައީސް އަކީ ރައީސް އަބްދުﷲ ޔާމީން ކަމަށެވެ. އަނިޔާވެރިކަން ހުއްޓުވަން ވެރިކަމަށް އައި މީހުންގެ އަނިޔާ އިންތިހާއަށް ދިއުމާ ވައްކަން ހުއްޓުވަން އައި މީހުންގެ ވައްކަން އަތް ނުފޯރާ ފަށަށް ދިއުމަކީ ކުރި ތާއީދު އަނބުރާ ނެގުމުގެ އެންމެ ބޮޑު މަގުސަދު ކަމަށް ވައްޑެ ވިދާޅުވިއެވެ.
