އަޟްހާ އީދު ފާހަގަކުރުމަށް ލިބިފައިވާ ފުރުސަތުގައި އާއިލާތަކަށް ޒިޔާރަތްކުރިއަށް ހެލްތް ޕްރޮޓެކްޝަން އެޖެންސީގެ އިރުޝާދުތަކަށް ސަމާލުވުމަށް ރައީސް އޮފީހުގެ ތަރުޖަމާނު މަބްރޫކް އަޒީޒް އިލްތިމާސް ކުރައްވައިފިއެވެ.
މަބްރޫކް ކުރެއްވި ޓުވީޓެއްގައި ވިދާޅުވީ، ކޮވިޑުން ދިފާއުވުމަށް ސިއްހީ މާހިރުން ދެއްވާފައިވާ އިރުޝާދުތަކާއި އެއްގޮތަށް މާސްކު އެޅުމަށާއި، ސެނިޓައިޒްކުރުމަށާއި، ގިނަގިނައިން އަތް ދޮންނަން ވާނެ ކަމަށެވެ.
އަދި ގިނަ މީހުން އެއްވެ ނޫޅުމަށާއި ގައިދުރުކަން ބެހެއްޓުމަށް މަބްރޫކް ވަނީ ހަނދާންކޮށްދެއްވާފައެވެ. މަބްރޫކް މިހެން ވިދާޅުވެފައިވާއިރު ކޮވިޑް ފެތުރެން ފެށުމުން މާލެ ސަރަހައްދުގައި އަޅާފައިވާ ފިޔަވަޅުތަކަށް ލުއި ދީފައިވަނީ ފާހަގަކުރަމުންދާ ބޮޑު އީދު ބަންދާ ސުކޫލް ޗުއްޓީ އާއި ދިމާ ކޮށެވެ. ލިބުނު ލުއިތަކާއެކު ގިނަ ބަޔަކު ވަނީ އާއިލާތަކަށް ޒިޔާރަތް ކުރުމަށް އުފަން ރަށަށް ފުރައިގެން ގޮސް އީދު ކުޅިވަރުތައްވެސް ފާހަގަކުރަން ފަށާފައެވެ.
