ރައްޔިތުންގެ މަޖިލީހުގެ ރައީސް، މުހައްމަދު ނަޝީދު އަވަހާރަކޮށްލަން ދިން ބޮމުގެ ހަމަލާގައި ބައިވެރިވި ހަތަރު މީހަކަށް ދައުވާ ކުރަން ޕީޖީއަށް ފޮނުވައިފިއެވެ.
މެއި މަހުގެ ހަވަނަ ދުވަހު ނަޝީދަށް އަމާޒުކޮށް ދިން ހަމަލާގެ ތުހުމަތުގައި ނުވަ މީހަކު ވަނީ ހައްޔަރުކޮށްފައެވެ.
އަމަލީ ގޮތުން އުޅުނު ކަމަށް ތުހުމަތުކުރެވޭ ކަމަށް ފުލުހުން ހާމަކޮށްފައިވަނީ އަހުމަދު އަދުހަމް، 25، އާއި މއ. ފޭރުގެ މުޖާޒް އަހްމަދު 21، އާއި ގއ. ކޮނޑޭ، ފޮޅޭމާ، ތަހުމީން އަހްމަދު، 32 އަދި ދަރަވަންދޫއިން އިން ހައްޔަރުކުރި ލ.ގަން، ދުންފިނި އުފާ، އަހުމަދު ފާތިހު، 23، ނ. މަނަދޫ، ނޫރީގެ، އަލީ ހައިޝަމްއެވެ.
ޕީޖީ ހުސައިން ޝަމީމް ވިދާޅުވީ، ނަޝީދަށް ދިން ހަަމަލައާ ގުޅިގެން އެންމެ ފުރަތަމަ ތުހުމަތު ކުރެވުނު ހަތަރު މީހުންގެ ތަހުގީގާއި ގުޅޭ މައްސަލަ ލިބިފަވާ ކަމަށެވެ. އަދި މިމަހުގެ 24 ވަނަ ދުވަހު މިމައްސަލައާއި ގުޅޭ ތަފްސީލް ދިނުމަށް ފުލުހުންނާއެކު ހާއްސަ ޕްރެސްކޮންފަރެންސެއްގައި ބައިވެރިވާނެ ކަމަށްވެސް ޕީޖީ ވިދާޅުވިއެވެ.
