އެމްޑީޕީން ވެރިކަމަށް އައީ ވަކި ކަންތައްތަކެއް ރައްޔިތުންނަށް ކޮށްދޭން ކަމަށް އިނގުރާދޫ ދާއިރާގެ މެމްބަރު މުހައްމަދު ވަހީދު ވައްޑޭ ވިދާޅުވެއްޖެއެވެ.
ޕާޓީގެ އެންމެ ބޮޑު މަގުސަދުކަށް ވާންޖެހޭނީ ވެރިކަން ދެމެހެއްޓުން ކަމަށް އަސްލަމް ވިދާޅުވެފައިވާތީ އެކަމަށް ރައްދު ދެއްވާ ވައްޑޭ ކުރެއްވި ޓުވީޓެއްގައި ވިދާޅުވީ، ރައީސް މައުމޫނުގެ 30 އަހަރުވަންދެން ކުރެއްވީ ވެރިކަން ދެމެހެއްޓުމުގެ މަސައްކަތް ކަމަށާއި އެކަމަކު އެމްޑީޕީން އައީ ވަކި ސިޔާސަތުތަކެއްގެ މައްޗަށް އެކުލެވޭ ވަކި ކަންތައްތަކެއް ރައްޔިތުންނަށް ކޮށްދޭން ވައުވެގެން ކަމަށެވެ.
އަދި އެމްޑީޕީން އައީ އެކަންކަން ފުއްދައިދިނުމަށްޓަކައި ވެރިކަން ކުރަން ކަމަށާއި ނަމަކަށް ވެރިކަމެއް ކޮށްލާކަށް ނޫން ކަމަށް ވައްޑޭގެ ޓުވީޓުގައި ވިދާޅުވެފައިވެއެވެ.
މެމްބަރު އަސްލަމް ވިދާޅުވެފައިވަނީ، ރާއްޖޭގައި މިއޮތް ވެރިކަމަކީ އެމްޑީޕީން ގަބޫލުކުރި އަސާސެއްގެ މައްޗަށް ބިނާކޮށް އެކުލަވާލެވުނު ވެރިކަމެއް ކަމަށާއި، ޕާޓީގެ އެންމެ މުހިންމު ކަމަކަށް ވާން ޖެހޭނީ ވެރިކަން ދެމެހެއްޓުން ކަމަށެވެ.
