މިނިވަން ދުވަސް އައި އިރު މިތިބީ ބިރިވެރިކަމެއްގައި ކަމަށް މަޑުވަރީ ދާއިރާގެ މެމްބަރު އާދަމް ޝަރީފް އުމަރު ވިދާޅުވެއްޖެއެވެ.
ސަރުކާރުން އަމަލު ކުރަންވީ ގޮތް ހާމަކުރަން އެމްޑީޕީ ގައުމީ މަޖިލީހުގެ ބައްދަލުވުމެއް މިރޭ ބޭއްވުމަށް ނިންމެވުމާއި ގުޅިގެން އާދަމް ޝަރީފް ކުރެއްވި ޓުވީޓެއްގައި ވިދާޅުވީ، ފުލުހުންނާއި ޕްރެސެކިއުޓަރ ޖެނެރަލް ރޭ ބޭއްވި ޕްރެސްގައި ދެއްކެި ވާހަކަތަކާއި ގުޅިގެން އުފެދުނު ބިރުވެރިކަން ވަކިން ބޮޑުވެފައިވާ ކަމަށެވެ. ރައްޔިތުންގެ ސަލާމަތާއި ރައްކާތެރިކަމަށްޓަކައި މަސައްކަތް ކުރައްވާނެ ކަމުގެ ޔަގީންކަމެއް ސަރުކާރުން ނުދެއްވީތީ ކަންބޮޑުވާ ކަމަށް އާދަމް ޝަރީފް ވިދާޅުވިއެވެ.
ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދުގެ ފުރާނަފުޅު ދުއްވައިލަން ދިން ޓެރަރިސްޓު ހަަމަލާގައި ފުލުހުންގެ ތަހުގީގަށް ހޯދުނު ހޯދުންތަކާއި ގުޅިގެން ސަރުކާރުން އަމަލު ކުރަންވީ ގޮތް ނިންމަން އެމްޑީޕީ ގައުމީ މަޖިލީހުގެ ބައްދަލުވުމެއް މިރޭ ބާއްވަން ވަނީ ތާވަލުކޮށްފައެވެ.
އެމްޑީޕީ ގައުމީ މަޖިލީހުގެ މެމްބަރުންނަށް މިއަދު މެންދުރުފަހު ވަނީ ބައްދަލުވުން އޮންނާނެކަމަށް ބުނެ މެސެޖެއް ފޮނުވައިފަ އެވެ. އެގޮތުން ބައްދަލުބުން އޮންނާނީ މިރޭ 9:00 ގައި ޒޫމް މެދުވެރިކޮށް ކަމަށް މެސެޖުގައި ވަނީ ބުނެފަ އެވެ.
