މިނިވަންކަން ދިފާއުކުރެވޭނީ ހުރިހާމާނައެއްގައި ގައުމުން ފަގީރުކަން ނައްތާލެވިގެން ކަމަށް މާވަށު ދާއިރާގެ މެމްބަރު މުހައްމަދު ސައީދު ވިދާޅުވެއްޖެއެވެ.
މިއަދު ފާހަގަކުރަމުންދާ 56 ވަނަ މިނިވަންދުވަހާއި ގުޅިގެން ކުރެއްވި ޓުވީޓެއްގައި މުހައްމަދު ސައީދު ވިދާޅުވީ، ބަދަލުތައް އަވަސް ވާދަވެރި ދުނިޔެއެއްގައި މިނިވަންކަން ދިފާއު ކުރެވޭނީ ހުރިހާ މާނައެއްގައި ދިވެހި ގައުމުން ފަގީރުކަން ނައްތާލެވިގެން ކަމަށެވެ. ރައީސް ޔާމީންގެ ސަރުކާރުގައި އިކޮނޮމިކް މިނިސްޓަރުކަންވެސް ކުރައްވާފައިވާ މުހައްމަދު ސައީދު ވިދާޅުވީ ދިވެހި ވަސީލަތް ދިވެހިން އަގުކޮށް އުފައްދާ ތިޔާގިވާނޭ ފުރިހަމަ ބާރު ދިވެހިންގެ މި ދިވެހި ރާއްޖޭގައި އެބަހުރި ކަމަށެވެ. ނަމަވެސް މިކަމަށް ހަރުދަނާ ސަރުކާރެއް ވަރަށް މުހިއްމު ކަމަށް މާވަށު ދާއިރާގެ މެމްބަރު ވިދާޅުވެފައިވެއެވެ.
މިނިވަން ދުވަސް ފާހަގަ ކުރަމުންދާއިރު އިދިކޮޅު ފަރާތްތަކުން ދަނީ އެމްޑީޕީގެ ސަރުކާރުން ރާއްޖޭގެ ދާހިލީ ގިނަ ކަންކަން ނިންމުމުގައި އިންޑިއާއަށް ބަރޯސާވާކަމަށް ތުހުމަތު ކުރަމުންނެވެ. ނަމަވެސް ސަރުކާރުން ދަނީ އިދިކޮޅު ފަރާތްތަކުގެ މި ތުހުމަތުތަކަށް އިންކާރު ކުރަމުންނެވެ.
