މާލޭގެ ހެދިގޮނޑުދޮށާއި، ރަސްފަންނާއި އުސްފަސްގަނޑަށް ވެލި އެޅުމުގެ މަސައްކަތް މާލެ ސިޓީ ކައުންސިލުން ފަށައިފިއެވެ.
މާލެ ސިޓީ ކައުންސިލުން ބުނީ ހެދިގޮނޑުދޮށާއި، ރަސްފަންނަށް ވެލި އެޅުމުގެ މަސައްކަތް ފަށާފައިވަނީ މި ދުވަސްވަރު މޫސުމަށް އައިސްފައިވާ ބަދަލުގެ ސަބަބުން އެ ދެތަން ވަރަށް ބޮޑަށް ގިރާފައިވާތީ ކަމަށެވެ.
މާލޭގައި އޮންނަ އުސްފަސްގަނޑަކީ ގިނަ ރައްޔިތުންތަކެއް ކަސްރަތު ކުރުމަށާއި އެކި ކުޅިވަރުތައް ކުޅުމަށް ބޭނުން ކުރަމުން އަންނަ ސަރަހައްދެއް ކަމަށް ވާއިރު އެ ސަރަހައްދު މިހާރު އޮތީ ވަރަށް ބޮޑަށް އަޑިގުޑަންވެފައެވެ. އެހެންކަމުން ސިޓީ ކައުންސިލުން މިދުވަސްވަރު އެތަނަށް ވެލި އެޅުމުގެ މަސައްކަތް ކުރަނީ އެތަން ލެވެލް ކުރުމަށްޓަކައި ކަމަށް މައުލޫމާތުދެއެވެ.
ސިޓީ ކައުންސިލުން ބުނީ މި ތިން ތަނަށް ވެލި އެޅުމުގެ މަސައްކަތް ކުރިއަށް އޮތް ހަތަރު ދުވަހުގެ ތެރޭގައި ނިންމާލެވޭނެ ކަމަށެވެ. ހެދިގޮނޑުދޮށާއި، ރަސްފަންނާއި އުސްފަސްގަނޑަށް ގާތްގަނޑަކަށް 400 ޓަނުގެ ވެލިއަޅަންޖެހޭނެކަމަށް ސިޓީ ކައުންސިލުން ލަފާކުރެއެވެ. ވެލި ނަގަމުންދަނީ ހުޅުމާލޭ ދެވަނަ ފިޔަވަހިން ކަމަށްވެސް ސިޓީ ކައުންސިލުން ހާމަކުރެއެވެ.
