ރަށުންބޭރުގައި ތިބޭ ދޭސީ ޓީޗަރުންނަށް އެލަވަންސް ދޭނަމަ ނަތީޖާ ނެރެން ފަސޭހަވާނެ ކަމަށް މަޑުއްވަރީ ދާއިރާގެ މެމްބަރު އާދަމް ޝަރީފް އުމަރު ވިދާޅުވެއްޖެއެވެ.
އާދަމް ޝަރީފް ކުރެއްވި ޓުވީޓެއްގައި ވިދާޅުވީ، ދިރާސީ އަހަރު ފެށޭއިރު ބިދޭށީ ޓީޗަރުންނާއި އެއްގޮތަށް ރަށުން ބޭރުގައި ހިދުމަތްކުރާ ދޭސީ ޓީޗަރުންނަށް ފުޑް އަދި އެކޮމެޑޭޝަން އެލަވަންސް ދޭ ގޮތަށް އުސޫލު ބަދަލުކޮށްފިނަމަ ފެންވަރު ރަނގަޅު ދޭސީ ޓީޗަރުން ލިބޭނެ ކަމަށެވެ. އަދި ގައުމީ މަންހަޖުގެ ނަތީޖާ ނެރެން މާބޮޑަށް ފަސޭހަވާނެ ކަމަށްވެސް އާދަމް ޝަރީފް ވިދާޅުވިއެވެ.
2020-2021 ވަނަ އަހަރުގެ ދިރާސީ އަހަރުގެ ކިޔެވުން ފެށުމަށް ހަމަޖެހިފައިވަނީ އޮގަސްޓްމަހުގެ 10 ވަނަ ދުވަހުއެވެ. ނަމަވެސް އެކަޑަމިކް މުވަށްޒަފުން ސުކޫލަށް ނިކުންނަން ޖެހެނީ އޮގަސްޓްމަހުގެ ތިން ވަނަ ދުވަހުއެވެ. ސުކޫލްތަކުގައި ކިޔަވައިދޭން ހަމަޖެހިފައިވާ ބިދޭސީ ޓީޗަރުން މިހާރު ވަނީ ރާއްޖެ އަންނަން ފަށާފައެވެ.
