މާލޭގެ ގެ ތަކުގެ ކަރަންޓް ބިލް ބޮޑުވަނީ ކުރީ ސަރުކާރާ ހެދި ކަމަށް މެދުހެންވޭރު ދާއިރާގެ މެމްބަރު އަލީ އާޒިމް ވިދާޅުވެއްޖެއެވެ.
މިދިޔަ މަހުގެ ކަރަންޓް ބިލް ބޮޑުވުމުގެ ސަބަބުން ބައެއް ރައްޔިތުން ކަންބޮޑުވުން ފާޅު ކުރަމުންދާތީ މާލޭގެ މޭޔަރ ޑރ މުހައްމަދު މުއިއްޒު ކުރެއްވި ޓުވީޓަކަށް އިޝާރާތް ކުރައްވާ އަލީ އާޒިމް ކުރެއްވި ޓުވީޓެއްގައި ވިދާޅުވީ، މިއަދު މިޖެހޭ އުނދަގުލާ، ތަކުލީފަކީ އިއްޔެ ކަންކުރިގޮތުން ވާގޮތެއް ކަމަށެވެ. އަދި އެކަން އެގޮތައް ދިމާމިވަނީ ޑރ މުއިއްޒު އިންނެވި ކެބިނެޓަކުން ދެކޮޅުނުޖެހޭ އިގްތިސާދީ ގިނަ ނިންމުންތަކެއް ނިންމުމުގެ ސަބަބުން ކަމަށް އާޒިމް ވިދަޅުވެފައިވެއެވެ. އާޒިމްގެ ޓުވީޓްގައި އިރާދަފުޅުން މާދަމައަކީ މާރަގަޅުދުވަހަކަށް ހަދާނެ ކަމުގައި ވިދާޅުވިއެވެ.
ކަރަންޓްބިލާ ގުޅޭގޮތުން މޭޔަރު ކުރެއްވި ޓުވީޓުގައި ވިދާޅުވީ، މި މަހުގެ ކަރަންޓު ބިލަކީ މާލޭގެ ގިނަ ރައްޔިތުންނަށް ދެއްކޭވަރަށްވުރެ ބޮޑު ބިލެއް ކަމަށެވެ. އަދި ހާލުގައި އުޅެމުންދާ ރައްޔިތުން އިތުރަށް ހާލުގައި ޖެހޭގޮތް މިވަނީ ވެފައި ކަމަށާއި ރައްޔިތުން އަތުގައި ނެތް ފައިސާއަކުން ބިލް ދައްކަން މިވަނީ ޖެހިފައި ކަމަށް މުއިއްޒުގެ ޓުވީޓގައި ވިދާޅުވެފައިވެއެވެ.
