ކުޑަކުދިންގެ ހިޔާގެ 4 ވަނަ ފަންގިފިލާގައި ހިނގި އަލިފާނުގެ ހާދިސާ ތަހުގީގީ އިދާރާތަކާއި ގުޅިގެން ތަހުގީގު ކުރަމުންދާ ކަމަށް ޗައިލްޑް އެންޑް ފެމިލިީ ޕްރޮޓެކްޝަން ސާރވިސް އިން ބުނެފިއެވެ.
އެ ސާރވިސްއިން ނެރުނު ބަޔާނެއްގައި ބުނެފައިވަނީ ހިޔާގެ މީގެ ކުރިންވެސް ވަނީ އަލިފާނުގެ ހާދިސާތައް ހިނގާފައި ކަމަށެވެ. ކުޑަކުދިންގެ ހިޔާގައި ދިރިއުޅެމުންދިޔަ 54 ކުދިން ރައްކާތެރި މާހައުލުތަކަށް ބަދަލުކުރުމުގެ މަސައްކަތުގެ ތެރެއިން މިހާރު އެތަނުގައި ހުރީ އެންމެ ކުއްޖެއް ކަމަށެވެ. އެގޮތުން އެކުއްޖާވެސް ދިރިއުޅެމުންދަނީ ކުޑަކުދިންގެ ހިޔާގެ ގޯތި ތެރޭގައި އަމާން ހިޔާގެ ގޮތުގައި ކަނޑައަޅާފައިހުރި ވަކި އިމާރާތެއްގައި ކަމަށެވެ.
މީގެ އިތުރުން މިވަގުތު 18 އަހަރުން މަތީގެ ދެ ފަރާތަކަށް ދައުލަތުން ރައްކާތެރިކަން ފޯރުކޮށްދެމުންދާ ކަމަށްވެސް އެ ބަޔާނުގައިވެއެވެ. މި އަލިފާނުގެ ހާދިސާއިން ތަނުގައި ބަލަހައްޓަމުންދާ އެއްވެސް ކުއްޖަކަށް ގެއްލުމެއް ލިބިފައިނުވާ ކަމަށްވެސް މިނިސްޓްރީގެ ބަޔާނުގައިވެއެވެ. މިފަދަ ކަންކަމުގައި ކަމުގެ ހަގީގަތް އޮޅޭގޮތަށް އެއްވެސް ފަރާތަކުން މައުލޫމާތު ނުފެތުރުމަށްވެސް ވަނީ އިލްތިމާސްކޮށްފައެވެ.
