ސިޔާސީ ގޮތުން މީހަކާ ހިޔާލު ތަފާތުވިއަސް ދޮގު ވާހަކަތައް ފެތުރުން ބަލައިނުގަނެވޭނެ ކަމަށް ވިދާޅުވެ ކުރީގެ އިސްލާމިކް މިނިސްޓަރ ޑރ ޝަހީމް، މީދޫ ދާއިރާގެ މެމްބަރު ރޮޒައިނާ އަށް ރައްދު ދެއްވައިފިއެވެ.
ކުރީގެ ރައީސް އަބްދުﷲ ޔާމީން އަކީ އައިސިސްގެދިދަ ނަގައިން ރާއްޖޭގައި މުޒާހަރާ ކުރުވި މީހެއް ކަމަށް ރޮޒައިނާ ވަނީ ދާދި ފަހުން ވިދާޅުވެފައެވެ. މިކަމަށް ރައްދު ދެއްވާ ކުރެއްވި ޓުވީޓެއްގައި ޑރ ޝަހީމް ވިދާޅުވީ، އިސްލާމްދީނުގެ ރީތި ތަޞައްވުރާއި ތަހުޒީބު ވިސްނުމުގެ މައްޗަށް އިޖުތިމާޢީ ވެށި ބިނާކުރަން ރައީސް ޔާމީން ވަރަށް މަސައްކަތްކުރެއްވި ކަމަށެވެ. ވީމާ އެއްވެސް މީހަކު ދެކެ ސިޔާސީ ގޮތުން ހިޔާލު ތަފާތު ވިޔަސް ދޮގުވާހަކަތައް ދައްކައި ނަފްރަތު އުފެއްދުމަކީ ބަލައިގަނެވޭނެ ވާހަކައެއްނޫން ކަމަށް ޑރ ޝަހީމް ވިދާޅުވިއެވެ.
އަދި މީދޫ ދާއިރާގެ މެމްބަރު ރޮޒައިނާ އާދަމްގެ ވާހަކަފުޅު ޝަހީމް ވަނީ ކުށްވެރިކޮށްފައެވެ.
