ހުޅުމާލެ ފޭސް 2 އަދި ޗައިނާ މޯލްޑިވްސް ފްރެންޑްޝިޕް ބްރިޖްއަކީވެސް ކުރީގެ ރައީސް މައުމޫނުގެ ތަސައްވުރެއް ކަމަށާއި ކުރީގެ ރައީސް މައުމޫނު ރައީސް ޔާމީން އަށް ކުރެއްވި ތާއީދު ގެންދެވީ ރަައީސް ޔާމީން ގެންނަވަމުން ދިޔަ ތަރައްގީއަކީ އެމަނިކުފާނުގެ ލެގަސީ ދުއްވާލަން ކުރެއްވި ކަމެއް ކަމަށް ވިދާޅުވެ ޕީއެންސީގެ ލީޑަރު އަބްދުއް ރަހީމް ހެއްދެވީ އިތުރުފުޅެއް ކަމަށް ޔުމުނާ މައުމޫނު ވިދާޅުވެއްޖެއެވެ.
ރޭ ޕީޕީއެމް އާއި ގިނަ ބަޔަކު ގުޅުމަށް ބޭއްވި ރަސްމިއްޔާތެއްގައި ވާހަކަފުޅު ދައްކަވަމުން އަދުރޭ ވިދާޅުވީ، ކުރީގެ ރައީސް މައުމޫނާއި ކޮއްކޯފުޅު ޔާމީންގެ ގުޅުން ގޮސްވެފައި ވަނީ 2016 ވަނަ އަހަރުގެ އޮކްޓޯބަރު މަގު ރައީސް ޔާމީން އެދިވަޑައިގަތުމުން ރައީސް މައުމޫނާ އަދުރޭ ބައްދަލު ކުރެއްވި ކަމަށެވެ. މިބައްދަލު ކުރެއްވުން އޮތީ މައުމޫނުގެ ރަސްމީ އޮފީހުގައި ކަމަށާއި ރައީސް ޔާމީނާމެދު އޮތް ކަންބޮޑުވުންތައް މައުމޫން އޭނާއަށް ހިއްސާ ކުރެއްވި ކަމަށެވެ.
އަދުރޭގެ މި ވާހަފުޅުތަކަށް އިޝާރާތް ކުރައްވާ ކުރެއްވި ޓުވީޓެއްގައި މިނިސްޓަރ އޮފް އާރޓްސް އެންޑް ކަލްޗަރ ޔުމްނާ މައުމޫނު ވިދާޅުވީ، ރައީސް ޔާމީނަށް ކުރެއްވި ތާއީދު އަނބުރާ ގެންދެވީ ޕީ.ޕީ.އެމް ގެ ސަރުކާރު ޕީ.ޕީ.އެމް ގެ އުސޫލުތަކާއި ދުރަށް ގޮސް ކޮރަޕްޝަނާ އަނިޔާވެރިކަމުގެ ތެރެއަށް ދިޔުމުން ކަމަށެވެ. އަދި އޭރު ކަން ހިނގާދިޔަ ގޮތް ހަނދާން ނެތޭހާ ދުވަސް ނުވާ ކަމަށް ޔުމްނާ ވިދާޅުވިއެވެ.
