ހަލާކުވެގެން މަގުމަތީގައި ބަހައްޓާފައި ހުންނަ އުޅަނދާއި ގިނަ ދުވަސްތަކެއް ވަންދެން ޕާކުކޮށްފައި ހުންނަ އުޅަނދުތައް ނަގަން ފަށައިފިއެވެ.
އެގޮތުން މިއަދު ހަތަރު ފްރޮޅުލީ އުޅަނދުތައް އެންމެ ފުރަތަމަ ނަގާފައިވަނީ މައްޗަށްގޮޅީ ފާށަނާކިލެގެފާނުމަގުންނެވެ.
އަދި ދެ ފުރޮޅުލީ އުޅަނދުތައް ނެގުމުގެ މަސައްކަތް ފަށާފައިވަނީ މައްޗަންގޮޅި ނިކަގަސްމަގުންނެވެ. މާލެ ސިޓީ ކައުންސިލުން ބުނީ މިމަސައްކަތް ކުރަން ފަށާފައިވަނީ ފުލުހުންނާއި ގުޅިގެން އަމަލީ ގޮތުން ފުލުހުންގެ ބައިވެރިވުމާއެކުގައި ކަމަށެވެ.
މި އުޅަނދުތައް ނެގުމުގެ ކުރިން ޖޫން މަހުގެ 22 އިން 27 އަށް މާލެ ސިޓީ ކައުންސިލުން ވަނީ ސާރވޭ އެއް ކޮށްފައެވެ. އެގޮތުން ސިޓީ ކައުންސިލްގެ މި ސާރވޭއަށް ފާހަގަވެފައިވާ އުޅަނދުތަކުގެ ތެރޭގައި ހިމެނެނީ ގަލޮޅުން 20 އުޅަނދު، މައްޗަންގޮޅިން 43 އުޅަނދު، ހެންވޭރުން 34 އުޅަނދު އަދި މާފަންނުން 62 އުޅަނދު ނައްތާލަންޖެހޭކަމަށެވެ.
މާލޭސިޓީގެ މަގުމަތީގައި ހިނގާ ބިނގާވެއުޅޭ ފަރާތްތަކާއި، ވެހިކަލް ދުއްވާ ފަރާތްތަކަށް ދަތިވާގޮތަށް ބަހައްޓާފައި ހުންނަ އެއްގަމު އުޅަނދު ފަހަރާއި އަދި ހަލާކުވެ، ނުދުއްވާ ހުންނަތާ ގިނަދުވަސްވެފައިވާ އުޅަނދު ފަހަރު މި މަސައްކަތުގެ ދަށުން ނަގާއިރު މަގުމަތީގައި އެގޮތަށް ބަހައްޓާފައި ހުރި އެފަދަ އެއްގަމު އުޅަނދު ފަހަރު ނެގުމަށް އިއުލާންގައި ވަނީ ކުރިން ބަޔާންކޮށްފައިވެއެވެ. އުޅަނދު ފަހަރުގެ ވެރިފަރާތުން ނުނަގާ ހުންނަ އެއްގަމު އުޅަނދުފަހަރު ” އެއްގަމު އުޅަނދު ޕާކު ކުރުމުގެ ގަވައިދު ” ގެ ދަށުން ނަގައި ނައްތާލާ ގޮތައް ވަނީ ހަމަޖެހިފައެވެ. މި ގޮތައް ނެގުމުގައި އުޅަނދާއި ތަކެއްޗަށް ލިބޭ ގެއްލުމާއި އެ އުޅަނދަކުން މަދުވާ ބާވަތްތަކަށް ސިޓީ ކައުންސިލުން ޒިންމާ ނުވާނެކަމަށް ވަނީ ބަޔާންކޮށްފައެވެ.
