މަނާތަކެތި ޖަލަށްވެއްދުމުގެ މައްސަލަ ހައްލުވަންދެން އޮޕަރޭޝަންތައް ހިންގާނެ ކަމަށް ކޮމިޝަނަރ އޮފް ޕްރިޒަންސް އަހުމަދު މުހައްމަދު ވިދާޅުވެއްޖެއެވެ.
ކޮމިޝަނަރ އޮފް ޕްރިޒަންސް ކުރެއްވި ޓުވީޓެއްގައި ވިދާޅުވީ، މިއަދާއި ހުސްވި ހަފްތާގައި އައްސޭރިޖަލާއި މާފުށީ ޖަލުގައި ވަނީ ކައިރިކައިރީގައި އޮޕަރޭޝަންތަކެއް ކުރިއަށް ގެންދެވިފައި ކަމަށެވެ.
އެގޮތުން މިއޮޕަރޭޝަންތަކުގައި ގިނަ އަދަދެއްގެ މަނާތަކެތި ވަނީ އަތުލާގަނެވިފައި ކަމަށްވެސް އަހުމަދު މުހައްމަދު ވިދާޅުވިއެވެ. އަދި މިމައްސަލައަށް ދާއިމީ ހައްލު ހޯދެންދެން، އަވަސްއަވަހަށް އޮޕަރޭޝަންތައް ކުރިޔަށް ގެންދާނެ ކަމަށްވެސް އޭނާ ވިދާޅުވިއެވެ.
އެކި ދުވަސްވަރު މަތިން ހިންގާ އެކި އޮޕަރެޝަން ތަކުގައި ޖަލަށް ވައްދާފައިވާ ތަފާތު ތަކެތި ދަނީ އަތުލައިގަންނަމުންނެވެ. މީގެ ތެރޭގައި މޮބައިލް ފޯނާއި ބައެއް ފަހަރު ތޫނު ހަތިޔާރުވެސް ހިމެނެއެވެ. މޮބައިލް ފޯނު ބޭނުންކޮށްގެން ޖަލުގައި ތިބޭ ކުށްވެރިން މީހުންގެ އަތުން އޮޅުވައިލައިގެން ފައިސާ ހޯދުމާއެކު ރިލޯޑް ކުރާ ވާހަކައަކީވެސް އަބަދުވެސް ދައްކާ ވާހަކައެކެވެ.
