ވިލިމާލެ ރައްޔިތުންނަށް ހާއްސަ ޕާކިން ޒޯނަށް އެދުމުގެ ފުރުސަތު މިމަހުގެ 16 އާ ހަމައަށް ހުޅުވާލައިފިއެވެ.
މާލެ ސިޓީގައި ދުއްވުމަށް ރަޖިސްޓްރީކޮށްފައިވާ އުޅަނދުގެ ތެރެއިން ވިލިމާލޭގައި ދިރިއުޅޭ ފަރާތްތަކުގެ އުޅަނދުފަހަރު އަގުނަގައިގެން ހަތަރު ފުރޮޅުލީ ވެހިކަލްތައް ޕާރކްކުރުމަށް ޖާގަ ދޫކުރުމަށްވަނީ މާލެ ސިޓީ ކައުންސިލުން ވަނީ ނިންމާފައެވެ. އެގޮތުން ޖާގަ ދޫކުރަނީ ކާރު، ވޭން އަދި 350 ކިލޯގެ ޕިކަޕްއަށެވެ. ޖާގަ ދޫކުރުމަށް ހަމަޖެހިފައިވަނީ ތިންރުއް ޕާކު (ސުނާމީ ބިނާ) ސަރަހައްދުގައި ހަދާފައިވާ ޕާކިން ޒޯން އިން 20 ޖާގައެވެ.
ސިޓީ ކައުންސިލުން ބުނީ ޕާރކިންގ ޒޯންގެ ޖާގައަށް އެދޭ ފަރާތްތަކުން 07 އޯގަސްޓްން ފެށިގެން 16 އޯގަސްޓްގެ 14:00 ގެ ކުރިން މާލޭ ސިޓީކައުންސިލްގެ އާއްމު ހިދުމަތްތަކާބެހޭ ބަޔަށް އެކަމަށް އެދި ސިޓީއާއިއެކު، އައިޑީކާޑުގެ ކޮޕީ، ވެހިކަލްގެ ރަޖިސްޓްރީ ކޮޕީ ހުށަހެޅުމަށް އެދޭ ކަމަށެވެ. ވިލިމާލޭގައި ދިރިއުޅޭ އެހެންނަމަވެސް ވިލިމާލޭގެ ރަށްވެއްސަކަށް ނުވާ ފަރާތެއްކަމުގައިވާނަމަ މިތަކެތީގެ އިތުރުން، ވިލިމާލޭގައި ދިރިއުޅެމުންދާ ފަރާތެއްކަން އެނގޭނެ ފަދަ ސިޓީއެއް ގޭގެ ވެރިފަރާތުގެ ނަމުގައި ހުށަހެޅުމާއެކު ސިޓީގައި ވިލިމާލޭ ސެކްޝަނުން ސައްހަކަމަށް ކަނޑައަޅާފައިވާ ތައްގަނޑު ޖެހުމަށް ޖާގަހޯދުމަށް އެދި ސިޓީ ހުށަހަޅަންވާނީ ވެހިކަލްގެ ވެރިފަރާތުން ނުވަތަ ޕަވަރ އޮފް އެޓަރނީ ލިބިފައިވާ ފަރާތުން ނުވަތަ އެއްބަސްވުމެއްގެ ދަށުން ވެހިކަލް ބޭނުންކުރާ ފަރާތުން ކަމަށް ސިޓީ ކައުންސިލްގެ އިއުލާނުގައި ބުނެފައިވެއެވެ. ޕާކިންގ ޒޯނުން ޖާގަ ލިބޭ ފަރާތްތައް ކަނޑައަޅާނީ އެންމެ މަތިން ޕޮއިންޓް ލިބޭ ފަރާތްތަކުގެ މެދުގައި ގުރުއަތު ލައިގެން ކަމަށް ސިޓީ ކައުންސިލުން ހާމަކުރެއެވެ.
