ހިޖުރައިގެ ހާދިސާއިން ދަސްކޮދެނީ އީމާންކަމާއި އަމިއްލަވަންތަކަމާއި އަޒުމާއި ހިއްވަރާއި ކެއްތެރިކަން ކަމަށް ޑރ މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ހިޖްރައިން 1443 ވަނަ އަހަރު ފެށުމުގެ މުނާސަބަތުގައި ކުރެއްވި ޓުވީޓެއްގައި ޑރ ޝަހީމް ވިދާޅުވީ، ކީރިތި ރަސޫލާގެ ހިޖުރައިގެ ހާދިސާގެ ސަބަބުން އިސްލާމީ ދައުވަތު ހިމާޔަތްކުރާނެ މުޖުތަމައާއި އަދުލުވެރި ދައުލަތާއި އިލްމީ ހަޟާރަތުގެ އަސާސްތައް ގާއިމުވެގެން ދިޔަ ކަމަށެވެ.
ނަބަވީ ހިޖްރައިން އިސްލާމީ އުންމަތަށް އުނގަންނައިދިން އެންމެ ފުރަތަމަ އަދި އެންމެ މުހިންމު ފިލާވަޅަކީ، ރަޙިމުގެ ގުޅުމާއި ގާތްތިމާގެ ކަމުގެ ގުޅުމުގެ އިތުރުން، އެންމެހައި މުސްލިމުންނަކީ، އިންސާނީ އަހްވަންތަކަމާއި، މާތް اللهُގެ އެއްކައުވަންތަކަމުގެ އަގީދާއިން ގުޅިލާމެހިފައި ތިބި ބައެއް ކަމެވެ.
ތަރައްގީއާއި ތަހުޒީބުގެ ގޮތުން މުޅި ދުނިޔެއަށް އިންގިލާބީ ބަދަލުތަކެއް ގެނެސްދިން އުންމަތަކަށް، އިސްލާމީ އުންމަތް ވެގެން ދިޔައީ، އެ މަތިވެރި ގުޅުމުގެ މަތީގައި މުސްލިމުން ދެމިތިބުމުގެ ސަބަބުންނެވެ. މިއަދު ދުނިޔޭގެ ކުރިމަތީގައި އިސްލާމީ އުންމަތް ނިކަމެތިވެ ބާރުކެނޑިގެން ދިޔައީ، އިސްލާމީ އަހުވަންތަކަމުގެ ގުޅުންތައް ދެމެހެއްޓުމުގައި ފަރުވާ ކުޑަކުރެވުމުގެ ސަބަބުން، އިސްލާމީ އުންމަތް ބައިބައިވެފައިވާތީއެވެ.
