މޯލްޑިވްސް މީޑިއާ ކައުންސިލް (އެމްއެމްސީ)ގެ މެމްބަރު ކަމަށް ކުރިމަތިލުމަށް ހުޅުވާލައިފިއެވެ.
މީޑިއާ ކައުންސިލުން މެމްބަރުކަމަށް ކުރިމަތިލުމަށް ހުޅުވާލީ އަމިއްލަ ގޮތުން އިންތިހާބު ވެފައިވާ މެންބަރަކު އިސްތިއުފާ ދެއްވުމުންނެވެ. ހޯމް މިނިސްޓްރީގެ އިއުލާނުގައިވާގޮތުން މެމްބަރުކަމަށް ކުރިމަތިލުމަށް އެދޭ ފަރާތްތަކުން މިމަހުގެ 17 ވަނަ ދުވަހުގެ މެންދުރު 13:30ގެ ކުރިން ފޯމް ހުށަހަޅަން ޖެހޭނެ ކަމަށެވެ.
އެމްއެމްސީގެ މެމްބަރުކަމަށް އިންތިހާބު ކުރާ މެމްބަރުންގެ ދައުރަކީ ދެ އަހަރެވެ. ވިދިވިދިގެން ދެ އަހަރު އެ ކައުންސިލްގެ މެމްބަރު ކަމެއް ނުކުރެވޭނެއެވެ.
މީޑިއާ ކައުންސިލްގެ މެމްބަރު ކަމަށް ކުރިމަތިލާ ފަރާތްތަކުގެ ޝަރުތަކީ ގާނޫނީ، ބަހުގެ، އިންސާނީ ހައްގުތަކުގެ، ދީނީ އިލްމުގެ ނޫނީ އިޖުތިމާއީ ސައިންސްގެ ދާއިރާއިން މަތީ ތައުލީމު ހާސިލްކޮށްފައިވާ ފަރާތަކަށް ވުމާއެކު އިޖުތިމާއީ ތަރައްގީއާ ދުޅަހެޔޮކަމުގެ ދާއިރާ އިން މަސައްކަތްކުރާ ނުވަތަ ކޮށްފައިވާ ފަރާތަކަށް ވާންޖެހެއެވެ.
