ރައްޔިތުންގެ އަޑު އަހައިގެން ކަންކަން ކުރުމުން އެކަމެއް އޮމާންކަމާއެކު ކުރިއަށް ގެންދެވޭނެ ކަމަށް މާލެ ސިޓީގެ މޭޔަރު ޑރ މުހައްމަދު މުއިއްޒު ވިދާޅުވެއްޖެއެވެ.
މާލޭ ސިޓީގެ ތަރައްގީގެ ޕްލޭން ހެދުމަށް ބާއްވާ ބައްދަލުވުންތަކުގެތެރެއިން ވިލިމާލޭގެ ރައްޔިތުންނާ ބައްދަލުކުރައްވައި ވާހަކަ ދައްކަވަމުން މޭޔަރ ވިދާޅުވީ، މިހާރު ފެށުމަށް ތައްޔާރުވަމުންދާ ބްރިޖް ހެދުމުގެ މަސައްކަތް ރައްޔިތުންގެ ހިޔާލަށް ހުށަހަޅާފައިނުވާކަމަށެވެ. އެހެންކަމުން މި މަޝްރޫއުގައި ވިލިމާލެއަށް އަތުވެދާނެ ބަދަލަކާމެދު ރައްޔިތުންގެ ކަންބޮޑުވުން އޮތްކަން ހާމަކުރައްވައި، ހާއްސަގޮތެއްގައި ވިލިމާލޭ އިންޑަސްޓްރިއަލް ސަރަޙައްދަށް ވެދާނެ ގޮތެއްގެ ކަންބޮޑުވުން ރައްޔިތުންގެ ތެރޭގައި އޮތްކަމަށް މޭޔަރު ވިދާޅުވިއެވެ.
އަދި ޕްލޭން ހަދަން ޖެހޭނީ ރައްޔިތުންގެ އަޑު އަހައިގެންކަމަށެވެ.
މޭޔަރު ވިދާޅުވީ މިބާވަތުގެ ކަންކަމުގައި ރައްޔިތުންގެ ހިޔާލު ހޯދުން މިހާރު ގާނޫނުން މަތިކުރެވިފައިވަނީ ކައުންސިލްތަކާ ކަމަށެވެ. އެހެންކަމުން އެ ޚިޔާލު ހޯދަންޖެހޭނީ ކައުންސިލް މެދުވެރިކޮށްކަމަށް މޭޔަރު ވިދާޅުވިއެވެ.
