މި އަހަރުގެ ސާފް ޗެމްޕިއަންޝިޕް ބޭއްވުމުގެ ފުރުސަތު ދިވެހިރާއްޖެއަށް ލިބުނުކަމުގެ ހަބަރު އުފަލާއިއެކު ފާހަގަކުރައްވާ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
މި އަހަރު ރާއްޖެއިން ސާފް ޗެމްޕިއަންޝިޕް ބޭއްވުމަށް ނީލަން ހުށަހަޅައި ކާމިޔާބުކުރީ ނޭޕާލާ ވާދަކޮށެވެ. މި ބައްދަލުވުމުގައި ބައިވެރިވި ހުރިހާ ޤައުމަކުންވެސް ވަނީ ރާއްޖޭގައި މުބާރާތް ބޭއްވުމަށް ތާއީދުކޮށްފަ އެވެ.
ރައީސް ވަނީ މި ހަބަރު އެއްސެވީ އުފަލާއިއެކު ކަމަށް ވިދާޅުވެފަ އެވެ. އަދި ވިދާޅުވީ މި މުބާރާތް ރާއްޖޭގައި ބޭއްވޭނެ ގޮތް ހެދުމަށް މަސައްކަތްކުރެއްވީތީ ދިވެހިރާއްޖޭގެ ފުޓުބޯޅަ އެސޯސިއޭޝަން އެފްއޭއެމްއާއި ކުޅިވަރު އާއިލާއަށް ޝުކުރު އަދާކުރައްވާ ކަމަށެވެ.
އެންމެ ފަހުން ރާއްޖޭގައި ބައިނަލްއަޤުވާމީ ފުޓުބޯޅަ މުބާރާތެއް ބޭއްވީ 2014 ވަނަ އަހަރުއެވެ. އެއީ އޭއެފްސީ ޗެލެންޖު ކަޕެވެ. އެންމެ ފުރަތަމަ ސާފް މުބާރާތުގެ މެޗުތަކެއް ރާއްޖޭގައި ކުޅުނީ 2008 ވަނަ އަހަރު އެވެ. އެ އަހަރު މި މުބާރާތް ހޮސްޓު ކުރީ ރާއްޖެއާއި ލަންކާ ގުޅިގެންނެވެ.
ރާއްޖޭއިން ސާފް ޗެމްޕިއަންޝިޕް މުބާރާތެއްގެ ޗެމްޕިއަންކަން އެންމެ ފަހުން ހޯދީ 2018 ވަނަ އަހަރު އެވެ. އެ އަހަރު ފައިނަލް މެޗުގައި ރާއްޖެއިން ވާދަކުރީ އިންޑިއާ އާ އެވެ.
