ހދ ކުޅުދުއްފުށި އަދި ހއ ދިއްދޫ އިންވެސް މޮނިޓަރިން ހާލަތު އުވާލައިފިއެވެ.
ކުޅުދުއްފުށި މޮނިޓަރިން ހާލަތަށް ގެނެސްފައިވަނީ އެރަށުގެ ފުލޫ ކްލިނިކަށް ދެއްކި 13 އަހަރުގެ ކުއްޖަކު ޕޮޒިޓިވްވުމުންނެވެ. އެރަށް މޮނިޓަރިން އިން ނަގާފައި މިވަނީ 17 ދުވަހަށް ފަހުއެވެ.
ކުޅުދުއްފުށިން ވަނީ ޖުމުލަ 66 މީހުން ޕޮޒިޓިވްވެފައެވެ.
ރީޖަނަލް ހޮސްޕިޓަލްގެ އެންމެ ފަހުގެ ތަފާސް ހިސާބުތައް ދައްކާގޮތުން މިހާރުވެސް އެރަށުގައި 47 ޕޮޒިޓިވް ކޭސް އެބަތިއްބެވެ. އިއްޔެވެސް އެރަށުން ވަނީ 101 ރެންޑަމް ސާމްޕަލް ނަގާފައެވެ. މީގެ ތެރެއިން އެއްވެސް ސާމްޕަލްއެއް ޕޮޒިޓިވް ވެފައެއް ނުވެއެވެ. އެހެންނަމަވެސް ޕޮޒިޓިވްވެފައިވަނީ ކުރިން ކޮވިޑް ޕޮޒިޓިވް މީހަކާއި ކޮންޓެކްޓްވެފައިވާ މީހެކެވެ.
މޮނިޓަރިން އުވާލިކަން އަންގާ އެޗްޕީއޭއިން ފޮނުވާފައިވާ ލިޔުމުގައި ވާގޮތުން ކުރިއަށް އޮތް 7 ދުވަހުގެ ތެރޭގައި ރަށުގެ އާބާދީގެ 5 އިންސައްތަ މީހުންގެ ރެންޑަމް ސާމްޕަލް ނެގުމަށް ވަނީ ޝަރުތު ކޮށްފައެވެ.
ދިއްދޫއިން މީހަކު ޕޮޒިޓިވްވެފައިވަނީ ޖުލައި މަހުގެ 27 ވަނަ ދުވަހުއެވެ. އެރަށް މޮނިޓަރިން އިން ނަގާފައި މިވަނީ 15 ދުވަސް ފަހުންނެވެ.
