ގޭގެއަށް ގޮސް ކުނިނަގާ ގޮތަށް ހަމަޖައްސަން ހުށަހަޅުއްވާނެ ކަމަށް މާލެ ސިޓީގެ މޭޔަރު ޑރ މުހައްމަދު މުއިއްޒު ވިދާޅުވެއްޖެއެވެ.
މިގޮތަށް ބަދަލު ކުރުމުން އަގު ނުދީ ކުނި އުކާ މީހުން ގިނަވާނެކަން ވެމްކޯއިން ފާހަގަކޮށްފައިވާ ކަމަށާއި ނަމަވެސް އެގޮތަށް އެކަން ވިޔަ ނުދީ ކުރިއަށް ގެންދިއުމަކީ ވެމްކޯގެ ޒިންމާއެއް ކަމަށާއި، ފައިސާ ހޯދުމަށް އެ ކުންފުނިން މަސައްކަތް ކުރަން ޖެހޭނެ ކަމަށް މޭޔަރު ވިދާޅުވިއެވެ.
ގޭގެއިން ކުނި ނެގުމުގައި ކުރިންވެސް އަމަލުކުރަނީ މިގޮތަށްކަމަށްވިއަސް ކޮވިޑް – 19 ގެ ހާލަތާ ގުޅިގެން ގޭގެއަށް ނުވަންނަގޮތް ވަނީ ބަދަލުކޮށްފައެވެ. ނަމަވެސް މިހާރު ކޮވިޑް – 19 ގެ ޙާލަތަށްފަހު އާ ޢާއްމުޙާލަތަށް ބަދަލުވާއިރު މިކަމަކީވެސް ބަދަލުކުރަންޖެހޭ ކަމެއްކަމަށް މޭޔަރު ވިދާޅުވިއެވެ. ކުނިނެގުން އެގޮތަށް ބަދަލުކުރަންޖެހޭ މައިގަނޑު ސަބަބެއްކަމުގައި މޭޔަރ ވިދާޅުވީ މާލޭ ސިޓީގެ މަގުތަށް ކުނިވެފައި އޮންނާތީކަމަށެވެ. މިގޮތަށް މަގުތަށް ކުނިވެފައި އޮންނަން ދޫކޮށްނުލެވޭނެކަމަށާއި އެގޮތުން މިކަމަށް ރަނގަޅު ހައްލެއްގެންނަ ޖެހޭކަމަށް ވިދާޅުވެ މިގޮތަށް ބަދަލުކުރާނީ މި ހިނގާ ސެޕްޓެމްބަރ މަހުގެ 21 ވަނަ ދުވަހުން ފެށިގެންކަމަށް މޭޔަރު ވިދާޅުވިއެވެ. މިކަމާބެހޭ ލިޔުން ވަރަށް އަވަހަށް ވެމްކޯއަށް ދާނެކަމަށްވެސް މޭޔަރު ވިދާޅުވިއެވެ. ކައުންސިލްގެ ތަރައްގީގެ ޕްލޭނަށް ޚިޔާލު ހޯދުމުގެ މާފަންނު ބައްދަލުވުގައި ރައްޔިތުންނާ މުހާތަބްކުރައްވައި ވާހަކަފުޅުދައްކަވަމުން މޭޔަރ ވިދާޅުވީ މިކަމާބެހޭ ބަންދަލުވުންތައް މިހާރު ނިންމާލާފައިވާ ކަމަށެވެ.
