ވޭތުވެ ދިޔަ ތިން އަހަރަށް ބަލާއިރު، މުވައްޒަފުން ތާޒާ ކުރުމަށާއި އެކި އެކި ގޮތްގޮތުން ހުނަރާއި މައުލޫމާތު ހިއްސާކޮށް ބިނާކުރުމުގެ ގޮތުން 20 ތަމްރީން ޕްރޮގްރާމެއް ހިންގާ 788 އޮފިސަރުންނަށާއި މުވައްޒަފުންނަށް އެކިއެކި ހުނަރާއި ތަމްރީނު ދަސްވެފައިވާކަމަށް ކޮމިޝަނަރ އޮފް ޕްރިޒަންސް އަޙްމަދު މުޙައްމަދުފުޅު ވިދާޅުވެއްޖެއެވެ.
މޯލްޑިވްސް ކަރެކްޝަނަލް ސަރވިސްގެ “ޕްރައިމަރީ ރެސްޕޮންސް ޓީމް ޓްރޭނިންގ” ގެ ހަ ވަނަ ބެޗް ނިމުމުގެ ރަސްމިއްޔާތު ރޭ ބާއްވާފައިވާއިރު ސީޕީ ވިދާޅުވީ، އެ މުވައްސަސާގެ ހިންގުން ހަރުދަނާކުރުމުގެ ގޮތުން ތަފާތު ދާއިރާތަކުން ޢިލްމީ، ޤާބިލު މުވައްޒަފުން ހޯދުމަށްޓަކައި؛ އެޑިއުކޭޝަނަލް ޕޮލިސީއެއް ޑްރާފްޓްކުރެވި، ދާދި އަވަހަށް އެންޑޯސްކުރައްވާނެކަމަށެވެ. މި ޕޮލިސީގެ ސަބަބުން މުވައްސަސާއަށް ބޭނުންވާ ދާއިރާތަކުން މަތީ ތަޢުލީމް ހާޞިލްކުރަން އެދޭ ފަރާތްތަކަށް ވަޒީފާއަދާކުރަމުން ލުއި ފަސޭހަކަމާއެކު ކިޔެވޭނެ ފުރުޞަތު ލިބިގެންދާނެކަމަށް ކޮމިޝަނަރ ވިދާޅުވިއެވެ.
45 ފަސް ދުވަހަށް ކުރިއަށް ގެންދިޔަމި ޓްރޭނިންގެ ހަވަނަ ބެޗްގައި އެމްސީއެސްގެ އެކި ޖަލުތަކުންނާއި ހެޑް އޮފީހުން 46 އޮފިސަރުން ބައިވެރިވި ނަމަވެސް، މި ޓްރޭނިންގ ފުރިހަމަކޮށްފައިވަނީ 42 އޮފިސަރުންނެވެ.
