ރާއްޖެ އައި ބްރެޒިލް އަންހެނެއްގެ އަތުން 15 މިލިއަން ރުފިޔާގެ މަސްތުވާތަކެތި އަތުލައިގަންފައިވާ ކަމަށް މޯލްޑިވްސް ކަސްޓަމްސް ސާރވިސް އިން ހާމަކޮށްފިއެވެ.
ކަސްޓަމްސްއިން ބުނީ އިއްޔެ މެންދުރުފަހު ރާއްޖެ އައި އުމުރުން 31 އަހަރުގެ ބްރެޒިލް އަންހެނެއްގެ އަމަލުތައް ހުރިގޮތުން އެމީހާއާއި މެދު ޝައްކު ކުރެވިގެން އޭނާގެ ލަގެޖް ކަސްޓަމްސްއިން ބަލާ ފާސްކުރި އިރު ލަގެޖްގެ ތެރެއިން މަސްތުވާތަކެތި ކަމަށް ޝައްކު ކުރެވޭ ތަކެތި ވަނީ ފެނިފައި ކަމަށެވެ. އަދި ފުރަތަމަ މަރުހަލާގައި ކަސްޓަމްސްއިން މިތަކެތި ޓެސްޓް ކުރި އިރު މަސްތުވާތަކެތީގެ ބާވަތެއްކަމުގައިވާ ކޮކެއިން އަށް ވަނީ ޕޮޒިޓިވްވެފައިވާ ކަމަށްވެސް ކަސްޓަމްސްއިން ހާމަކުރެއެވެ.
މިމީހާ އަތުން އަތުލައިގަތް މަސްތުވާތަކެތީގެ ޖުމުލަ ބަރުދަނަކީ 3،197 ކިލޯއެވެ. އަދި މިމައްސަލާގައި އަތުލައިގަތް މަސްތުވާތަކެތީގެ މަގުމަތީ އަގު ފަނަރަ މިލިއަން ނުވަލައްކަ އަށްޑިހަ ފަސްހާސް ރުފިޔާއަށް އަރާނެ ކަމަށްވެސް ކަސްޓަމްސްއިން ހާމަކުރެއެވެ. އަދި މިހާރު މި ތަކެއްޗާ އެމީހާވެސް ވަނީ އިތުރަށް ތަހުގީގު ކުރުމަށް ފުލުހުންނާއި ހަވާލުކޮށްފައި ކަމަށްވެސް ކަސްޓަމްސްއިން ހާމަކުރެއެވެ.
