މިއަދު މުޅި ވެރިކަން ވެސް ޖޯކަކަށްވެފައިވާ ކަމަށް ކުރީގެ ނައިބު ރައީސް ޑރ މުހައްމަދު ޖަމީލް އަހުމަދު ވިދާޅުވެއްޖެއެވެ. ޑރ ޖަމީލް ކުރެއްވި ޓުވީޓެއްގައި ވިދާޅުވީ، މިހާރު ވަޒީރުންވެސް ގާނޫނީ ނިޒާމަށް އިތުބާރު ނުކުރައްވާ ކަމަށެވެ. ރައީސުލްޖުމުހޫރިއްޔާ އިބްރާހިމް މުހައްމަދު ސާލިހަށް ދުސްތޫރީ މަސްއޫލިއްޔަތު ސާފުނުވޭތޯ ވިދާޅުވެ ޖަމީލް ވަނީ ސުވާޅު ކުރައްވާފައެވެ.
ޖަމީލް ވިދާޅުވީ ރައީސް ސާލިހުގެ ވަޒީރަކު ފާޅުގައި ކަމިޝަންތަކާއި މުއައްސަސާތައް ބޭޒާރުކޮށް ވާހަކަ ދައްކާއިރު އަދުލުވެރިކަމުގެ ޒައްރެއްވެސް ނެތްކަން ކަށަވަރު ކަމަށާއި މިއަދު މުޅި ވެރިކަން ޖޯކަކަށްވެއްޖެ ކަމަށެވެ.
ޑރ ޖަމީލް މިހެން ވިދާޅުވީ، އެންޓި ކޮރަޕްޝަން ކޮމިޝަން (އޭސީސީ) އިން ތުހުމަތުކުރާ އެމްއެމްޕީއާރްސީގެ ހިޔާނާތުގެ މައްސަލަ ކޯޓަށް ވައްދައިފިނަމަ ދައުލަތް އޮރިޔާން ކުރާނެ ކަމަށް ވިދާޅުވެ ޔޫތު މިނިސްޓަރ މަހުލޫފު ދެއްކެވި ވާހަކަފުޅާ ގުޅިގެންނެވެ. މިނިސްޓަރ މަހުލޫފްގެ މައްސަލައިގައި އޭސީސީން ބުނެފައިވަނީ މަހުލޫފު މަޖިލީހުގެ މެމްބަރަކަށް ހުންނެވިއިރު ސްޕެޝަލް އިކޮނޮމިކް ޒޯން ބިލަށް ވޯޓުދިނުމާއި ޕީ.ޕީ.އެމްގައި ދެމި ހުރުމުގެ ޝަރުތުގައި ރިޝްވަތުގެ ގޮތުގައި 33,000.00 އެމެރިކާ ޑޮލަރު ގަބޫލުކުރިކަމަށެވެ.
