މާލެ ސިޓީގެ ގޯތިގެދޮރާއި ގުޅޭގޮތުން ރައްޔިތުންނާއެކު ވާހާކަދެއްކުމަށް ބައްދަލުވުމެއް ބާއްވަން ނިންމާފައިވާ ކަމަށް މޭޔަރު ޑރ މުހައްމަދު މުއިއްޒު ވިދާޅުވެއްޖެއެވެ.
އެގޮތުން މާލޭ ސިޓީގެ ތަރައްގީގެ ޕްލޭނާއި، ފައިނޭންޝަލް ޕްލޭނާއި، އަންނަ އަހަރަށް ލަފާކުރާ ބަޖެޓާއި، އެކްޝަން ޕްލޭނަށް ޚިޔާލު ހޯދުމަށް ރޭ ހެންވޭރު ރައްޔިތުންނާ ބައްދަލުކޮށް ވާހަކަދައްކަވަމުން މޭޔަރ ޑރ. މުޢިއްޒު ވިދާޅުވީ ގޯތިގެދޮރާބެހޭގޮތުން ވާހަކަދެއްކުމަށް ރައްޔިތުންނަށް ހުޅުވާލައިގެން ބައްދަލުވުމެއް ބާއްވަން ނިންމާފައިވާ ކަމަށާއި މި ބައްދަލުވުން މިމަހުގެ 26 ވަނަ ދުވަހުގެރޭ ކާނިވާ ސަރަޙައްދުގައި އޮންނާނެކަމަށެވެ.
މޭޔަރ ވިދާޅުވީ ސިޓީ ކައުންސިލްގެ ފަރާތުން މިހާތަނަށް އެންމެ ގިނަ މަސައްކަތްކުރެވިފައިވާ އެއްކަމަކީ މާލޭ ރައްޔިތުންގެ ގެދޮރުގެ މައްސަލަ ހަމަޖެއްސުންކަމަށެވެ. އެހެންނަމަވެސް މި މަސައްކަތްތަކަށް ސަރުކާރުން އެދެވޭގޮތުގައި މިހާތަނަށް އެއްބާރުލުން ލިބިފައިނުވާކަމަށާއި ގުޅީފަޅަކީ މާލޭ ރައްޔިތުންގެ ގެދޮރުގެ މަންޒިލެއްކަމުގައި ހެދުމަށް ހުއްޓުމެއްނެތި މަސައްކަތްކުރުމަށް ކައުންސިލްގެ ސްޓްރަޓެޖިކް އެކްޝާން ޕްލޭންގައި ހިމަނައި މިހާތަނަށް ކަމާބެހޭ ފަރާތްތަކަށް މިކަން ހުށަހަޅައިފައިވާ ކަމަށް މޭޔަރު ވިދާޅުވިއެވެ.
ސިޓީ ކައުންސިލްގެ ފަރާތުން ބާއްވަމުން ގެންދާ ވަވަށު ބައްދަލުވުންތަކުގައި، ރައްޔިތުން އެންމެ ގިނައިން ހުށަހަޅާފައިވަނީވެސް ބިމާއި ގޯތިގެދޮރުގެ ވާހަކަތައް ކަމަށް ސިޓީ ކައުންސިލުން ހާމަކުރެއެވެ.
