މިއަހަރުގެ ފުރަތަމަ ކުއާޓަރުގައި ދައުވާ ކުރަން ޕީޖީއަށް ފޮނުވީ ތިން މައްސަލަ ކަމަށް އެންޓިކޮރަޕްޝަން ކޮމިޝަން އޭސީސީން ބުނެފިއެވެ.
އޭސީސީން ބުނީ ފެބްރުއަރީމަހުގެ ތެރޭގައި ދައުވާ ކުރަން ފޮނުވި ފުރަތަމަ މައްސަލައަކީ ގެދޮރުވެރިކުރުވުން ޕްރޮގްރާމްގެ ދަށުން ހއ ދިއްދޫގައި އިމާރާތްކޮށްފައިވާ ފްލެޓް ދޫކުރުމުގައި ސިޔާސީ ގޮތުން ނުފޫޒު ފޯރުވައި ހައްގު ނޫން ފަރާތްތަކަށް ދީފައިވާކަމަށް ބުނާ މައްސަލަ ކަމަށެވެ.
އަދި ދެވަނަ މައްސަލައެއްގެ ގޮތުގައި ފޮނުވާފައިވަނީ، ވޭސްޓް މެނޭޖްމަންޓް ކޯޕަރޭޝަން ވެމްކޯ އަށް ހެވީ ވެހިކަލް ހޯދުމަށް ކޮށްފައިވާ އިއުލާނުގައި ވެހިކަލްތައް 7 ދުވަހުގެ ތެރޭގައި ޑެލިވަރީ ކުރަންޖެހޭނެ ކަމަށް ބަޔާންކޮށްފައިވާ ކަމަށާއި ވެހިކަލް ޑެލިވަރީ ކުރުމަށް 7 ދުވަސްދީފައިވަނީ ކުންފުންޏަކުން މިހާރު ވެހިކަލް އެތެރެކޮށްފައިވާތީ ވަކި ފަރާތަކަށް ނާޖައިޒު ފައިދާއެއް ހޯދާދިނުމަށް ކަމަށް ބުނާ މައްސަލައެވެ.
އަދި ސްޓޭޓް ޓްރޭޑިން އޯގަނައިޒޭޝަން އެސްޓީއޯއިން 27 މެއި 2016 ގައި އިމްޕޯޓްކުރި އެޓޮކޯ ބޭހުގެ ނަމްބަރުގެ ބޮޑު ބައެއް 2018 ވަނަ އަހަރުގެ މާރިޗު މަހުގެ ނިޔަލަށް މުއްދަތު ހަމަވެފައިވާއިރު، އެކުންފުނިން އެބޭހުގެ އިތުރު ބެޗެއް ޑިސެމްބަރު 2018ގައި އޯޑަރުކޮށްފައިވާ ކަމަށް ބުނާ މައްސަލަ އަކީ މިއަހަރުގެ ފުރަތަމަ ކުއާޓަރުގައި ތިން ވަނަ އަށް ދައުވާ ކުރަން ޕީޖީ އަށް އޭސީސީން ފޮނުވި މައްސަލައެވެ.
ތަފާސްހިސާބުތަކަށް ބަލާއިރު، މިދިޔަ އަހަރުވަނީ ޖުމްލަ 961 މައްސަލައެއް އޭސީސީން ބަލައި ނިންމާފައެވެ. މި އަދަދަކީ 2019ވަނަ އަހަރާ އަޅާބަލާއިރު %35 އިތުރު އަދަދެކެވެ.
