ސަރުކާރުގެ ހަމައެކަނި އަމާޒަކީ ރައީސް ޔާމީން ފްރޭމްކޮށް ނުހައްގުން އަދަބުދިނުން ކަމަށް ކުރީގެ ނައިބު ރައީސް ޑރ މުހައްމަދު ޖަމީލް އަހުމަދު ވިދާޅުވެއްޖެއެވެ.
ޑރ ޖަމީލް ކުރެއްވި ޓުވީޓެއްގައި ވިދާޅުވީ، އިންސާފުގެ ބެރުޖަހަމުން ވެރިކަމަށް ވަޑައިގަތް ރައީސުލްޖުމުހޫރިއްޔާ އިބްރާހިމް މުހައްމަދު ސާލިހުގެ ހަމައެކަނި އަމާޒަކީ އިދިކޮޅު ލީޑަރ ފްރޭމްކޮށް ނުޙައްގުން އަދަބުދިނުން ކަމަށެވެ.
ޖަމީލް ވަނީ މި ސަރުކާރަށް ކޮރަޕްޝަންގެ މައްސަލަތައް ބެލުމުންދާ ކަމާމެދު ސުވާލު އުފައްދަވާފައެވެ. އަދި ވެންޓިލޭޓަރ އާއި މަޙްލޫފްގެ މައްސަލަ އަށް ރައީސް ސާލިހުގެ ސީދާ ނުފޫޒް އެބައޮތް ކަމަށް ވިދާޅުވެ އެލިސްޓް ވަރަށް ދިގު ކަމަށްވެސް ޖަމީލްގެ ޓުވީޓުގައި ވަނީ ވިދާޅުވެފައެވެ.
ޑރ ޖަމީލް މިގޮތަށް ވިދާޅުވެފައިމިވަނީ ކުރީގެ ރައީސް އަބްދުﷲ ޔާމީންގެ މައްޗަށް ދައުލަތުން އުފުލާފައިވާ މަނީ ލޯންޑަރިންނާއި ރިޝްވަތު ގަބޫލުކުރުމުގެ ދައުވާގެ އަޑުއެހުމެއް މިއަދަށް ތާވަލްކޮށްފައި ވަނިކޮށެވެ.
