ބްރެޒިލް އިން ރާއްޖެއައި މީހެއްގެ އަތުން 16.72 ކިލޯގެ މަސްތުވާތަކެތި އަތުލައިގެންފައިވާ ކަމަށް މޯލްޑިވްސް ކަސްޓަމްސް ސާރވިސްއިން ހާމަކޮށްފިއެވެ.
ވައިގެ މަގުން ބްރެޒިލްއިން ރާއްޖެއައި އެގައުމުގެ ރައްޔިތެއްގެ އަތުން މަސްތުވާތަކެތި ކަސްޓަމްސްއިން އަތުލައިގަތީ މިމަހުގެ 18 ވަނަ ދުވަހުއެވެ. އެގޮތުން އުމުރުން 29 އަހަރުގެ މި އަންހެންމީހާގެ އަމަލުތައް ހުރިގޮތުން އެމީހާއާއި މެދު ޝައްކު ކުރެވިގެން އޭނާގެ ލަގެޖް ކަސްޓަމްސްއިން ބަލާ ފާސްކުރިއިރު ލަގެޖްގެ ތެރެއިން މަސްތުވާތަކެތި ކަމަށް ޝައްކު ކުރެވޭ ތަކެތި ވަނީ ފެނިފައި ކަމަށެވެ. އަދި ފުރަތަމަ މަރުހަލާގައި ކަސްޓަމްސްއިން މި ތަކެތި ޓެސްޓްކުރި އިރު މަސްތުވާތަކެތީގެ ބާވަތެއް ކަމުގައިވާ ކޮކޮއިން އަށް ވަނީ ޕޮޒިޓިވްވެފައި ކަމަށް އެ އިދާރާއިން ހާމަކުރެއެވެ.
މިމައްސަލާގައި އަތުލައިގަނެވުނު މަސްތުވާތަކެތީގެ މަގުމަތީގެ އަގު އަށްޑިހަ ތިން މިލިއަން ރުފިޔާއަށް އަރާ ކަމަށް ކަސްޓަމްސްއިން ހާމަކުރެއެވެ.
