ތިންލައްކަ އަށްވުރެ ގިން މީހުން ކޮވިޑް19 ދިފާއު ވެކްސިންގެ ދެ ޑޯޒް ފުރިހަމަކޮށްފިއެވެ.
އެޗްޕީއޭގެ އެންމެ ފަހުގެ ތަފާސް ހިސާބުތައް ދައްކާގޮތުން 300،064 މީހުން ވަނީ ވެކްސިންގެ ދެ ޑޯޒް ފުރިހަމަކޮށްފިއެވެ.
ހެލްތު ޕްރޮޓެކްޝަން އެޖެންސީ(އެޗް.ޕީ.އޭ)އިން އާއްމުކޮށްފައިވާ ތަފާސްހިސާބުތަކަށް ބަލާއިރު ހޯމަ ދުވަހު ވެކްސިންގެ ދެވަނަ ޑޯޒް ޖެހީ 476 މީހުންނެވެ. އޭގެ ތެރޭގައި ހިމެނެނީ މާލެ ސަރަހައްދުން ދެވަނަ ޑޯޒް ޖެހި 261 މީހުންނާއި، ރަށްރަށުން ދެވަނަ ޑޯޒް ޖެހި 215 މީހުންނެވެ. މިއާއެކު ރާއްޖެއިން ވެކްސިން ފުރިހަމަކުރި މީހުންގެ ޖުމްލަ އަދަދު ވަނީ 300،064 އަށް އަރާފައެވެ.
ހޯމަ ދުވަހު ވެކްސިންގެ ފުރަތަމަ ޑޯޒް މާލެ ސަރަހައްދުން ޖެހީ 1662 މީހުންނެވެ. އަދި އަތޮޅު ތެރެއިން ވެކްސިންގެ ފުރަތަމަ ޑޯޒް ޖެހީ 2191 މީހުންނެވެ. މިހާތަނަށް ރާއްޖެއިން ވެކްސިން ޖަހާފައިވަނީ 376،630 މީހުންނެވެ.
