ހުޅުމާލޭގައި އިންޓަރނޭޝަނަލް ސުކޫލެއް ހަދަން ކުވައިތު ކުންފުންޏަކާއި ހަވާލުކޮށްފިއެވެ.
މިނިސްޓްރީ އޮފް އެޑިއުކޭޝަންގައި މިއަދު ބޭއްވި ރަސްމިއްޔާތެއްގައި ހުޅުމާލޭގައި އިންޓަރނޭޝަނަލް ސްކޫލެއް އިމާރަތްކޮށް ހިންގުމަށް ހަވާލުކޮށްފައިވަނީ އަލްޖެރީ ހޯލްޑިންގ ގްރޫޕާއެވެ.
މި އެއްބަސްވުމުގައި މިނިސްޓްރީ އޮފް އެޑިއުކޭޝަންގެ ފަރާތުން ސޮއިކުރެއްވީ މިނިސްޓަރ ޑރ. އާއިޝަތު އަލީއެވެ. އަދި އަލްޖެރީ ހޯލްޑިންގ ގްރޫޕްގެ ފަރާތުން ސޮއިކުރެއްވީ އެ ކުންފުނީގެ ޗެއަރމަން ޠަލާލް ހަލީފާ އަލް ޖެރީއެވެ. މިނިސްޓްރީން ހާމަކުރާ ގޮތުގައި މި ސުކޫލުގައި ކިޔަވައިދޭނީ ފައުންޑޭޝަން ސްޓޭޖުން ފެށިގެން ގްރޭޑް 12 އާ ހަމައަށެވެ. މި ސުކޫލަކީ ގާތްގަނޑަކަށް 1200 ދަރިވަރުންގެ ޖާގައިގެ ސްކޫލެއް ކަމަށް އެޑިއުކޭޝަން މިނިސްޓްރީން ހާމަކުރެއެވެ.
މި ސުކޫލްގައި އިނގިރޭސި މީޑިއަމްއަށް ކިޔަވައިދޭއިރު އަރަބި ބަސް ވެސް ކިޔަވައިދިނުމަށް ހަމަޖެހިފައިވާ ކަމަށް އެޑިއުކޭޝަން މިނިސްޓްރީން ހާމަކުރެއެވެ. މި ސުކޫލް އިމާރާތް ކުރުމުގެ މަސައްކަތް ބަހާލާފައިވަނީ 2 ފިޔަވައްސަކަށް ބަހާލައިގެން ކަމަށްވެސް އެޑިއުކޭޝަނުން ހާމަކުރެއެވެ. އެގޮތުން ފުރަތަމަ ފޭސްގައި ހަދާ ސުކޫލްގައި އަންނަ ދިރާސި އަހަރު ކިޔަވައިދިނުމަށް ހަމަޖެހިފައިވާއިރު ދެވަނަ ފިޔަވަހީގައި ކިޔަވައިދިނުމަށް ހަމަޖެހިފައިވަނީ 2023 ގައި ކަމަށް އެޑިއުކޭޝަން މިނިސްޓްރީން މައުލޫމާތުދެއެވެ.
