ރައީސުލްޖުމޫރިއްޔާ އިބްރާހިމް މުހައްމަދު ސާލިހުގެ އަމަލުތައް ބަހައްޓާ ގޮތުން އެމްޑީޕީގެ އާއްމު މެމްބަރުންވެސް ތިބީ ލަދުން ކަމަށް މާވަށު ދާއިރާގެ މެމްބަރު މުހައްމަދު ސައީދު ވިދާޅުވެއްޖެއެވެ.
މުހައްމަދު ސައީދު ކުރެއްވި ޓުވީޓެއްގައި ވިދާޅުވީ، މަޝްރޫއުތައް ފެށުމުގެ މާކުރިން ބައިބަޔަށް ހުޅުވާ ރިބަން ކެނޑުން ހުއްޓާލަން ޖެހޭ ކަމަށެވެ. އަދި ކަޑަ ޖެހުމަކީ ނަތީޖާ ނެރުން ނޫން ކަމަށާއި ރައީސް ސާލިހުގެ އަމަލުތައް ބަހައްޓަވަމުންދާ ގޮތުން އެމްޑީޕީގެ އާއްމު މެމްބަރުންވެސް ތިބެނީ ލަދުން ކަމަށް މާވަށު ދާއިރާގެ މެމްބަރުގެ ޓުވީޓުގައި ވަނީ ވިދާޅުވެފައެވެ.
މުހައްމަދު ސައީދު މިގޮތަށް ވިދާޅުވީ، 2021 ވަނަ އަހަރުގެ ތެރޭގައި ފަސް ޓާޝަރީ ހޮސްޕިޓަލް ރައްޔިތުންނަށް ލިބޭނެ ކަމަށް މިދިޔަ އަހަރުގެ ނޮވެމްބަރު މަހު ރައީސް ސާލިހު ވިދާޅުވެފައިވާތީ އާއި އަދި މިއަދުގެ ވަގުތެއްގައި ޒަމާނީ ފެންވަރަށް ފަސް ޓާޝަރީ ހޮސްޕިޓަލެއް ތަރައްގީ ކުރަމުން ދާ ކަމަށް ރައީސް ވިދާޅުވެފައިވާތީ އެކަމަށް އިޝާރާތް ކުރައްވައެވެ. މީގެ ކުރިން ރައީސް ސާލިހު ވިދާޅުވެފައިވަނީ، ތިލަމާލެ ބުރިޖްވެސް ބައިބަޔަަށް ހަދާ ހުޅުވަމުން ދާނެ ކަމަށެވެ.
