ރާއްޖޭގެ އާބާދީގެ 12އަހަރާއި 17 އަހަރާ ދެމެދުގެ 30,109 ކުދީންނަށް ފައިޒަރ ވެކްސިންގެ ފުރަތަމަ ޑޯޒް ދީފައިވާ ކަމަށް އެޑިއުކޭޝަން މިނިސްޓްރީން ހާމަކޮށްފިއެވެ.
މިއީ 12 އަހަރާއި 17 އަހަރާއި ދެމެދުގެ ވެކްސިންޖެހޭ ކެޓަގަރީގެ 70 އިންސައްތަ އާބާދީއަށްވުރެ އިތުރު އަދަދެކެވެ. މިއީ ރާއްޖޭގެ ދަރިވަރުންގެ ރައްކާތެރި ކަމަށް ކުރެވެމުންދާ މަސައްކަތަށް ލިބުނު ބޮޑު ކާމިޔާބީއެއް ކަމަށް އެމިނިސްޓްރީން ހާމަކުރެއެވެ.
މިހާތަނަށް ރާއްޖޭގެ 108 ސުކޫލެއްގެ ދަރިވަރުންނަށް ވެކްސިން ދިނުމުގެ ޕްރޮގްރާމް ވަނީ ފަށާފައެވެ.
ރާއްޖޭގެ ސުކޫލްތަކުގައި ވެކްސިން ދިނުމުގެ ޕްރޮގްރާމް ފަށާފައިވާއިރު ސުކޫލްތަކުގައި އުމުރުން 12 އަހަރުން މަތީގެ ދަރިވަރުންގެ ތެރެއިން ވެކްސިން ޖެހޭނެ، އުމުރުފުރާގެ ތިބީ ގާތްގަނޑަކަށް 40000 ދަރިވަރުން ކަމަށް އެޑިއުކޭޝަނުން ވަނީ ހާމަކޮށްފައެވެ.
ރާއްޖެއަށް ވަނީ އެމެރިކާ ސަރުކާރުން އެއްލައްކަ އަށް ވުރެ ގިނަ ޕައިޒަރ ވެކްސިންގެ ޑޯޒް ހަދިޔާކޮށްފައެވެ. ހެލްތް ޕްރޮޓެކްޝަން އެޖެންސީން ވަނީ ޕައިޒަރ ވެކްސިން ޖެހުމަށް ފަސް ގުރޫޕެއް ކަނޑައަޅާފައެވެ.
މިހާތަނަށް ރާއްޖެއިން ވަނީ 376،630 މީހުންނަށް ވެކްސިން ދީފައެވެ.
