ޒުވާނުން ކުށްތަކަށް އަރައިގަންނަ ސަބަބު ދެނެގަތުމަށް ދިރާސާއެއް ކުރަނީ

ޔޫތު މިނިސްޓްރީގައި ބޭއްވި ރަސްމިއްޔާތެއްގައި މިނިސްޓްރީގެ ފަރާތުން މި އެއްބަސްވުމުގައި ސޮއިކުރެއްވީ ސްޓޭޓް މިނިސްޓަރ ހުސައިން އިސްމާއިލެވެ. އަދި އެމް.އެން.ޔޫގެ ފަރާތުން ސޮއިކުރެއްވީ ޑެޕިއުޓީ ވައިސް ޗާންސެލަރ ޑރ. އައިޝަތު ޝެހެނާޒް އާދަމެވެ.

މި ދިރާސާއާގުޅޭގޮތުން ވާހަކަދައްކަވަމުން އެމް.އެން.ޔޫގެ ޑެޕިއުޓީ ވައިސް ޗާންސެލަރ ޑރ. އައިޝަތު ޝެހެނާޒް ވިދާޅުވީ،  ޒުވާން އަންހެން އަދި ފިރިހެނުން ވަޒީފާތަކަށް ނުނިކުންނަ ސަބަބުތައް ދެނެގަތުމަށް މި ދިރާސާގެ ތެރެއިން މަސައްކަތް ކުރެވިގެންދާނެކަމަށެވެ. އަދި ގާނޫނުގައި ތަކުރާރުކޮށް ކުށްކުރުމުން އަދަބު ދިނުމުގައި ހުރި ގޮންޖެހުންތައް ދެނެގަތުންވެސް ހިމެނޭ ކަމަށް ޝެހެނާޒް ވިދާޅުވިއެވެ. މީގެ އިތުރުންވެސް ޒުވާނުން ވަޒީފާއަށް ނުގޮސް ތިބުމުގެ ސަބަބުން އުޅުމަށް އަންނަ ބަދަލުތައް ދެނެގަތުމާއެކު ޒުވާނުންގެ ދިރުއުޅުމުގެ އާދަކާދައިގެ ސަބަބުން ޖިސްމާނީ އަދި ނަފްސާނީ ދުޅަހެޔޮކަމަށް އަންނަ ބަދަލުތައް ދެނެގަތުމުގެ އިތުރުން ޒުވާނުން ހުސްވަގުތު ހޭދަކުރާ ގޮތްވެސް ދެނެގަތުމަށް ވަނީ ހަމަޖެހިފައި ކަމަށް ޝެހެނާޒް ވިދާޅުވިއެވެ.

ޔޫތު މިނިސްޓްރީން ބުނީ މި ދިރާސާއަށް ރާއްޖޭގެ ހާއްސަ މާލެ، ވިލިމާލެ، ހުޅުމާލެ، ހދ، ށ، ބ، ކ، އދ، މ، ދ، ލ، ގދ، ފުވައްމުލައް ސިޓީ އަދި އައްޑޫ ސިޓީން މައުލޫމާތު އެއްކުރެވިގެންދާނެ ކަމަށެވެ.