ޖަޕާން ސަރުކާރުން ރާއްޖެއަށް 110 މިލިއަން ޖަޕާނީސް ޔެންގެ އެހީއެއް ދީފިއެވެ.
މި އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ، މިނިސްޓަރ އޮފް ހަޔަރ އެޑިއުކޭޝަން ޑރ. އިބްރާހިމް ހަސަންއެވެ. ޖަޕާނުގެ ފަރާތުން ސޮއިކުރެއްވީ ޖަޕާން އިންޓަރނޭޝަނަލް ކޯޕަރޭޝަން އެޖެންސީ، ޖައިކާގެ ރެސިޑެންޓް ރެޕްރެޒެންޓޭޓިވް މިޓްސުޔޮޝީ ކަވަސާކީއެވެ.
މީހުން ބިނާ ކުރުމަށް ސަރުކާރުން ކުރާ މަސައްކަތަށް އެއްބާރުލުން ދިނުމުގެ ގޮތުން މިއަދު އެއްބަސްވުމެއްގައި ސޮއިކުރި އިރު މިކަމާއި ގުޅޭ އެކްސްޗޭންޖް އޮފް ނޯޓްސްގައި ފޮރިން މިނިސްޓަރ އަބްދުﷲ ޝާހިދު އާއި ޖަޕާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު ކެއިކޯ ޔަނާއީ ސޮއިކުރީ މިދިޔަމަހުއެވެ.
މިއެއްބަސްވުމުގެ ދަށުން ފޯރުކޮށްދޭ އެހީ ހަރަދު ކުރުމަށް ހަމަޖެހިފައިވަނީ 6 ދަރިވަރަކަށް ހުރިހާ ހަރަދެއް ދޭގޮތަށް ސްކޮލަރޝިޕްގެ ފުރުސަތު ހޯދައިދިނުމަށްކަމަށް ސަރުކާރުން ބުނެއެވެ. މިދިޔަ އަހަރުވެސް ޖަޕާނު ސަރުކާރުން ވަނީ މި އެހީތެރިކަން ފޯރުކޮށްދީފައެވެ.
