ޔޫޓީއެފް އާއި ތިލަމާލެ މަޝްރޫއު ތަޅުލެވިފައިވަނީ އެއް ތަޅަކުން ކަމަށް މާވަށު ދާއިރާގެ މެމްބަރު މުހައްމަދު ސައީދު ވިދާޅުވެއްޖެއެވެ.
މުހައްމަދު ސައީދު ކުރެއްވި ޓުވީޓެއްގައި ވިދާޅުވީ، އުތުރު ތިލަފަޅުގެ އެއްބަސްވުން ރައްޔިތުންގެ މަޖިލީހަށްވެސް ސިއްރުކޮށް ތިލަމާލެ ބުރިޖްގެ ނަމުގައި ސޮއިކުރުން ސައްހައެއް ނުވާނެ ކަމަށެވެ. ސައީދު ވިދާޅުވީ، ޔޫޓީއެފް އާއި ތިލަމާލެ މަޝްރޫއު ތަޅުލެވިފައިވަނީ އެއް ތަޅަކުން ކަމަށެވެ. ޔޫޓީއެފްގެ އެއްބަސްވުން ސައްހަ ކަމަށް ރައީސް ސާލިހު ވިދާޅެއް ނުވާނެ ކަމަށް ސައީދު ވިދާޅުވިއެވެ.
ގްރޭޓަރ މާލޭ ކަނެކްޓިވިޓީ ޕްރޮޖެކްޓް މަޝްރޫގައި އިންޑިއާ ކުންފުންޏާއެކު ސަރުކާރުން ސޮއިކުރީ މިއަދުއެވެ. މި ޕްރޮޖެކްޓްގެ ދަށުން 6.7 ކިލޯ މީޓަރުގެ ދިގު ބްރިޖް އަދި ކޯސްވޭއިން މާލެއާއި ވިލިމާލެއާއި، ތިލަފުށި އަދި ގުޅީފަޅު ގުޅާލުމަށް ހަމަޖެހިފައިވެއެވެ. އިންޑިއާ ހިލޭ އެހީއާއި ލައިން އޮފް ކްރެޑިޓްގެ ދަށުން ވަނީ މި މަޝްރޫއަށް ބޭނުންވާ މާލީ އެހީ ހަމަޖައްސާފައެވެ. އެގޮތުން މި މަޝްރޫއަށް 100 މިލިއަން ޑޮލަރުގެ ގްރާންޓް އަދި 400 މިލިއަން ޑޮލަރުގެ ލައިން އޮފް ކްރެޑިޓް އިންޑިއާ ސަރުކާރުން ދީފައިވެއެވެ.
