ގިނަ އަދަދެއްގެ މިޔަރު އުރަހަ ބޭރު ކުރަން އުޅެނިކޮށް ކަސްޓަމްސް އިން އަތުލައިގެންފިއެވެ.
މޯލްޑިވްސް ކަސްޓަމްސް ސާރވިސް އިން ކުރެއްވި ޓުވީޓެއްގައި ބުނެފައިވަނީ، މިޔަރު އުރަހަ އަޅާފައި 14 ފޮށިގަނޑެއް ވެލާނާ އިންޓަރނޭޝަނަލް އެއާޕޯޓުން ހިފަހައްޓާފައިވާ ކަމަށާއި މިތަކެތީގެ ބަރުދަނުގައި 243 ކިލޯ ހުރި ކަމަށެވެ. ކަސްޓަމްސްއިން ބުނީ މިޔަރު އުރަހަ ބަންދުކޮށްފައިވާ ފޮށިތަކުގައި ޖަހާފައިވަނީ ލޮނު މަސް ކަމަށެވެ.
މީސް މީޑިއާގައި މިކަމާ ގުޅޭ ވީޑިއޯއެއްވެސް އާއްމުވެފައިވާއިރު މިމައްސަލަ ކަމާބެހޭ ފަރާތްތަކުން ތަހުގީގު ކުރަމުންދާ ކަމަށްވެސް ކަސްޓަމްސް އިން ހާމަކުރެއެވެ.
މިތަކެތި ހިފަހައްޓާފައި ވަނީ އޭވިއޭޝަން ސެކިއުރިޓީ ކޮމާންޑުން ކަމަށް ވަނީ މައުލޫމާތު ލިބިފައެވެ.
މީގެ ކުރިންވެސް ވަނީ ރާއްޖެއިން ބޭރު ކުރަން އުޅެނިކޮށް ގިނަ އަދަދެއްގެ މިޔަރު އުރަހަ އަތުލައިގަންފައެވެ.
