ދިވެހިރާއްޖޭގެ 56 ވަނަ މިނިވަން ދުވަސް ފާހަގަ ކުރުމުގެ ގޮތުން އެމްއެންޑީއެފް ކޯސްޓްގާޑުން "ފްލީޓް ރަން 2021" ގެ ނަމުގައި ސައުވީސް ގަޑިއިރަށް ކުރިޔަށްގެންދާ ދުވުމެއް ހުޅުމާލޭގައި ފަށައިފިއެވެ.
"ފްލީޓް ރަން 2021" ފެށުމުގެ ގޮތުން މިއަދު ބޭއްވި ހާއްސަ ރަސްމިއްޔާތު ޝަރަފުވެރިކޮށްދެއްވީ ޑިފެންސް މިނިސްޓަރ އަލްއުސްތާޛާ މާރިޔާ އަޙްމަދު ދީދީއެވެ.
އެމްއެންޑީއެފުން ބުނީ މާދަމާގެ 15:00 އާ ހަމައަށް ކުރިއަށްގެންދާ ގޮތަށް ހަމަޖެހިފައިވާ މި ދުވުމުގައި، ޗީފް އޮފް ޑިފެންސް ފޯސް މޭޖަރ ޖެނެރަލް ޢަބުދުﷲ ޝަމާލާއި، ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް ޢަބްދުއް ރަޙީމް ޢަބްދުއްލަތީފް އަދި ކޯސްޓްގާޑުގެ ކޮމަޑާންޓް ކާނަލް މުޙައްމަދު ސަލީމްގެ އިތުރުން އެމްއެންޑީއެފްގެ ޖެނެރަލް އޮފިސަރުން ވަނީ އަމަލީގޮތުން ބައިވެރިވެވަޑައިގަންނަވާފައި ކަމަށެވެ.
މި ދުވުމަކީ، ދިވެހިރާއްޖޭގެ 56 ވަނަ މިނިވަން ދުވަސް ފާހަގަ ކުރުމުގެ ގޮތުން އެމްއެންޑީއެފް ކޯސްޓްގާޑު ފްލީޓުން އިސްނަގައިގެން، ކޯސްޓްގާޑުގެ އުޅަނދުފަހަރުގައި މަސައްކަތްކުރާ ސިފައިންގެ މެދުގައި އޮންނަ އެކުވެރިކަމާއި އެއްބައިވަންތަކަމާއި ޤައުމީ ޖޯޝާއި ފޯރި އާލާކުރުމުގެ ގޮތުން ބާއްވާ ދުވުމެކެވެ. މި ދުވުން ކުރިއަށް ގެންދަނީ، ހުރިހާ ސިފައިންނަށް ހުޅުވާލައިގެންނެވެ. އަދި މިއަދު ކުރިއަށްދިޔަ ދުވުމުގެ ހަރަކާތުގައި، އަންހެން ސިފައިން ހިމެނޭހެން ޖުމުލަ 200 އަށްވުރެ ގިނަ ސިފައިން ދުވެފައިވެއެވެ.
