މިހާލަތުގައި ތުއްތު ކުއްޖާގެ އާއިލާގެ ކަރާމާތަށް އިހުތިރާމް ކުރަންވާނެ ކަމަށް ޖެންޑަރ މިނިސްޓްރީން ހާމަކޮށްފިއެވެ.
އދ. އޮމަދޫގައި މަސް ފެންގަނޑަކަށް ވެއްޓި 11 މަހުގެ ކުއްޖަކު މިއަދު ނިޔާވި ހާދިސާއާއި ގުޅިގެން ޖެންޑަރ މިނިސްޓްރީން ބުނެފައިވަނީ މި ހާދިސާ އެއަތޮޅުގެ އެފް.ސީ.އެސް.ސީގެ ސަމާލުކަމަށް ވަނީ އައިސްފައި ކަމަށެވެ.
މި ހާދިސާއާއި ގުޅިގެން ކަމާއި ގުޅުންހުރި ފަރާތްތަކުގެ ހާލަތު ދެނެގަނެ އެފަރާތްތަކަށް ދޭންޖެހޭ އިޖުތިމާއީ އަޅާލުން ފޯރުކޮށްދިނުމަށް ކުރަންޖެހޭ ކަންކަން، އަތޮޅު އެފް.ސީ.އެސް.ސީ އާއި ރަށު ކައުންސިލްއާއި ޗައިލްޑް އެންޑް ފެމިލީ ޕްރޮޓެކްޝަން ސަރވިސަސް ގުޅިގެން މިހާރު ވަނީ ފަށާފައި ކަމަށް މިނިސްޓްރީން ހާމަކުރެއެވެ.
އަދި ފުލުހުން މިމައްސަލައިގެ ތަހުގީގު ކުރަމުންދާ ކަމަށާއި އާއިލާއަށް ކުރިމަތިވެފައިވާ މިހިތާމަވެރި ވަގުތުގައި، އެންމެހާ ފަރާތްތަކުން ވެސް އާއިލާގެ ކަރާމާތައް އިޙްތިރާމް ކޮށްދެއްވުމަކީ މިނިސްޓްރީގެ ވަރަށް ބޮޑު އެދުމެއް ކަމަށް ބުނެފައިވެއެވެ.
އެކުއްޖާ ފެންގަނޑު ތެރެއަށް ވެއްޓިފައި އޮއްވާ ފެނިފައިވަނީ 3:35 އެހާކަންހާއިރު ކަމަށް މައުލޫމާތު ލިބޭއިރު މިކުއްޖާ ނިޔާވެފައިވަނީ ސިއްހީ މަރުކަޒުގައި ފަރުވާ ދެމުން ދަނިކޮށް ކަމަށް މައުލޫމާތުލިބެއެވެ.
