ރާއްޖެއިން ހަރުކަށި ފިކުރު ނައްތާލުމަށް އިސްލާމް ކިޔަވައިދޭން ބޭރު ޓީޗަރުން ގެނައުމުގެ ވިސްނުން މިނިސްޓްރީ އޮފް އެޑިއުކެޝަނުން ގެންގުޅޭ ކަމަށް އެމްޑީޕީގެ މެއި ހައެއް ކޮމެޓީން ބުނެފިއެވެ.
މެއި 6 ކޮމިޓީން ކުރަމުންދާ މަސައްކަތުގެ މައުލޫމާތު ދިނުމަށް ރޭ ބޭއްވި އެޕާޓީގެ ގައުމީ މަޖިލީހުގެ ޖަލްސާގައި ވާހަކަ ދައްކަވަމުން އެ ކޮމެޓީގެ މުގައްރިރު ވިލުފުށީ ދާއިރާގެ މެމްބަރު ހަސަން އަފީފް ވިދާޅުވީ ރާއްޖޭގެ ސުކޫލްތަކުގައި އިސްލާމް މާއްދާ ކިޔަވައިދޭނެ ވަކި އިންސައްތައަކީ ބޭރު ޓީޗަރުންގެ ގޮތުގައި ހަމަޖެއްސުމުގެ ވިސްނުން މިނިސްޓްރީން ގެންގުޅެމުންދާ ކަމަށެވެ.
މިހާރު އެޑިއުކޭޝަން މިނިސްޓްރީން ދަނީ ސުކޫލްތަކުގައި ތިބި ދަރިވަރުންގެ ތެރެއިން ހަރުކަށި ފިކުރަށް ގޮސްފައިވާ ދަރިވަރުން ފާހަގަކުރަމުން ކަމަށެވެ. އަދި މިކަން ހުއްޓުވުމަށް ގިނަ މަސައްކަތްތަކެއް މިނިސްޓްރީން ކުރަމުންދާއިރު އެކި ދިރާސާތައްވެސް ކުރަމުންދާ ކަމަށް އަފީފު ވިދާޅުވިއެވެ. މި އަހަރުގެ ދިރާސީ އަހަރު ފެށުނު އިރަށް ގުރުއާން ކިޔަވައިދޭން ބޭރުގެ ޓީޗަރުން ގެނައުމުންވެސް ގިނަ ބަޔަކު މިކަމަށް ވަނީ ފާޑުކިޔައިފައެވެ.
