އަފްޣާނިސްތާނުގެ ހާލަތާ ގުޅިގެން ކަންބޮޑުވުންފާޅުކޮށް އިންސާނީ ހައްގުތައް ކަށަވަރުކުރުމަށް ދިވެހި ސަރުކާރުން ކޮށްދެވެންހުރި މަސައްކަތްކޮށްދެއްވުމަށް އެޗްއާރުސީއެމުން އެދިއްޖެއެވެ.
ހިއުމަންރައިޓްސް ކޮމިޝަނުން ބުނީ އަފްޣާނިސްތާނާއި ދިވެހިރާއްޖެއަކީވެސް އޭޝިއާޕެސިފިކް ފޯރަމް (އޭޕީއެފް) މެމްބަރުންނަށް ވާއިރު އަފްޣާނިސްތާނަށް މިވަގުތު ދިމާވެފައިވާ ހައްސާސީ ހާލަތުގައި ތޯލިބާނުން އަމަލުކޮށްފާނެ ގޮތަކާމެދު އޭޕީއެފްއިން ވަނީ ކަންބޮޑުވުން ފާޅުކޮށްފައި ކަމަށެވެ.
އެހެންކަމުން އަފްޣާނިސްތާނުގެ އިންސާނީ ހައްގުތަކާއި ބެހޭ މުއައްސަސާތަކުގެ މުވައްޒަފުންނާއި އެފަރާތްތަކުގެ އާއިލާތަކާއި އެގައުމުގެ ކުޑަކުދިންނާއި އަންހެނުންނާއި އާއްމު ރައްޔިތުންގެ އިތުރަށް އެގައުމުގައި ދިރިއުޅެމުންދާ އެންމެހާއި ދިވެހި ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރުމަށް ދިވެހި ސަރުކާރުން ކޮށްދެވެން ހުރި އެންމެހައި މަސައްކަތްތަކެއް ކޮށްދެއްވާއި އިންސާނީ ހައްގުތައް ނަގަހައްޓައި ރައްކާތެރި ކުރުމަށް މަސައްކަތް ކޮށްދެއްވުމަށް ހިއުމަން ރައިޓްސް ކޮމިޝަން އޮފްދަ މޯލްޑިވްސް އިން ވަނީ ރައީސް އިބްރާހިމް މުހައްމަދު ސާލިހާއި ފޮރިން މިނިސްޓަރުގެ އަރިހުން އެދިފައެވެ.
ކޮމިޝަނުން މިކަމަށް އެދިފައިވަނީ ރައީސް ސާލިހަށާއި ފޮރިން މިނިސްޓަރު ޝާހިދަށް ވަކި ވަކިން ފޮނުއްވެވި ސިޓީއެއްގައެވެ.
