ރައީސް ޔާމީންއަށް ކޮށްފައިވާ ހުކުމާއި ގުޅޭގޮތުން ތިން ފނަޑިޔާރަކު ވާހަކަ ދައްކަވާ އޯޑިއޯތަކެއް ލީކުވުމާ ގުޅިގެން ރައްޔިތުންގެ މަޖިލީހަށް ހުށަހެޅި މައްސަލަ ބޭރުކޮށްލުމުން މަޖިލީހުގެ ތިން ކޮމިޓީއަކަށް މައްސަލަ ހުށަހަޅައިފިއެވެ.
މިމައްސަލަ ކޮމިޓީތަކަށް ހުށަހެޅުއްވީ މަޑުވަރީ ދާއިރާގެ މެމްބަރު އާދަމް ޝަރީފް އުމަރެވެ. އާދަމް ޝަރީފް ކުރެއްވި ޓްވީޓެއްގައި ވިދާޅުވީ، އެ މައްސަލަ މަޖިލީހުގެ ސަލާމަތީ ހިދުމަތްތަކުގެ ކޮމިޓީ 241 ކޮމިޓީ އާއި ހިއުމަން ރައިޓްސް ކޮމިޓީއާއި ޖުޑިޝަރީ ކޮމިޓީއަށް ހުށަހަޅުއްވާފައިވާ ކަމަށެވެ.
އާދަމް ޝަރީފު ވިދާޅުވީ ރައީސް ޔާމީން އަށް ނުހައްގު ފާސިގު ހުކުމެއް ކުރުމަށް ސަރުކާރުން ނުފޫޒު ފޯރުވައި ފަނޑިޔާރުންނަށް ރިޝްވަތުދީ ބިރުދެއްކި މައްސަލަ މަޖިލިސް އިން ބަލައިނުގަތުމުން ކޮމިޓީތަކަށް ހުށަހެޅުއްވީ ކަމަށެވެ.
ކުރީގެ ރައީސް އަބްދުﷲ ޔާމީންގެ މައްޗަށް ކޯޓުން ކޮށްފައިވާ ހުކުމަށް ނުފޫޒު ފޯރުވި ކަމަށް ބުނާ އޯޑިއޯތަކެއް ލީކުވުމާއި ގުޅިގެން ރައްޔިތުންގެ މަޖިލީހަށް ހުށަހެޅި މައްސަލަ ބޭރުކޮށްލަން ފާސްކޮށްފައި ވަނީ 20 މެމްބަރުންގެ ވޯޓުންނެވެ.
ރައީސް ޔާމީންގެ މައްޗަށް ހުކުމް ކުރި ބެންޗްގައި ތިއްބެވި ތިން ފަނޑިޔާރުން ކަމަށް ބެލެވޭ ބަޔަކުގެ އޯޑިއޯތަކެއް ލީކުވުމުން އެ މައްސަލަ ޖުޑީޝަލް ސާރވިސް ކޮމިޝަނުން ވެސް މިހާރު ވަނީ ތަހުގީގު ކުރަން ފަށާފައެވެ. މިމައްސަލައާ ގުޅިގެން އާދަމް ޝަރީފް ވިދާޅުވީ އޯޑިއޯތަކަކީ ސައްހަ އެއްޗެއް ނޫން ކަމަށް ފަނޑިޔާރުން މިހާރު ވިދާޅުވަމުންދަނީ ވަޒީފާގެ ބިރަށް ކަމަށެވެ. އަދި ޖޭއެސްސީގެ ތަހުގީގު ކުރިން މިކަމަށް ފަނޑިޔާރުން އިންކާރު ކުރެއްވި ނަމަ ގަބޫލުކުރަން ތަންކޮޅެއް ފަސޭހަވީސް ކަމަށެވެ.
