ދިރިއުޅުމުގެ ފެންވަރަށް އަންނަމުންދާ ބަދަލުތަކާއެކު، ކުށްކުރާފަރާތްތައް، އެ ކުށްތަކަށް އަރައިގަންނަ ގޮތްތައްވެސް މިއަދު މިއަންނަނީ ބަދަލުވަމުން ކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.
ސީޕީ ހަމީދު މިހެން ވިދާޅުވީ ފުލުހުންގެ ހިދުމަތް ރައްޔިތުންނާ ގާތުން ފޯރުކޮށްދިނުމަށް ކުރަމުންދާ މަސައްކަތުގެ ތެރެއިން ނ. މާފަރުގައި ގާއިމުކޮށްފައިވާ ޕޮލިސް ސްޓޭޝަން ރަސްމީކޮށް ހުޅުވުމަށް ފަހު ދެއްކެވި ވާހަކަފުޅުގައެވެ. ކޮމިޝަނަރ އޮފް ޕޮލިސް މުޙައްމަދު ހަމީދު ވިދާޅުވީ، ދިވެހި ފުލުހުންގެ ޚިދުމަތުގެ ސްޓްރެޓީޖިކް ޕްލޭންގައި، ކަނޑައެޅުނު 6 ޕްރަޔަރިޓީ ގެތެރޭގައި "ލޯކަލް ޕޮލިސިންގ" ކަނޑައެޅީ އަތޮޅު ތެރޭގައި ދެވޭ ޚިދުމަތަށް، އިތުރު އަހައްމިޔަތުކަމެއް ދިނުމުގެ މަގުސަދުގައި ކަމަށާއި މާފަރު ޕޮލިސް ސްޓޭޝަން ހުޅުވުމާ ގުޅިގެން، މަނަދޫ އިން ފުލުހުން އެޓެންޑުވެގެން ރަށަށް ފުލުހުން ޚިދުމަތް ފޯރުކޮށްދެމުން އައި އައުމަށް، މިއަދު މިވަނީ ނިމުމެއް ގެނެވިފައި ކަމަށެވެ. އަދި މާފަރަކީ އިންޓަނޭޝަނަލް އެއާޕޯޓެއް އޮތް ރަށަކަށްވުމުން، ލޯކަލް ޓުއަރިޒަމް ފުޅާވަމުމުގެ ފުރުސަތު އޮތް ރަށަކަށް ވެފައި އަތޮޅުގައި ޓުއަރިޒަމް ފުޅާވެގެން ދާދިއުމަކީ، އޭގެސަބަބުން ޓެކްނޮލޮޖީ އާއި ދިރިއުޅުމުގެ ފެންވަރަށްވެސް ބަދަލުއަންނާނެ ކަމެއް ކަމުގައި ފާހަގަކުރެއްވިއެވެ. އަދި އެ ބަދަލުތަކާއެކު، ކުށްކުރާފަރާތްތައް، އެ ކުށްތަކަށް އަރައިގަންނަ ގޮތްތައްވެސް މިއަދު މިއަންނަނީ ބަދަލުވަމުން ކަމުގައި ސީޕީ ވިދާޅުވިއެވެ.
އޭގެ އިތުރުން، މިހާރު އަމަލުކުރަން ފަށާފައިވާ ދިވެހި ފުލުހުންގެ ޚިދުމަތުގެ ގާނޫނުގައި ރައްޔިތުންނާއި ފުލުހުންގެ މެދުގައި އޮންނަ ގުޅުން ދެމެހެއްޓުމަށް ވަރަށް ބޮޑަށް ބާރު އަޅުއްވާފައިވާ ކަމަށާއި އެކަން ހާސިލުކޮށް ދެމެހެއްޓުމަށް އިންތިޒާމުތަކެއް ގާއިމުކުރުމަށް ގާނޫނު ލާޒިމުކުރާއިރު ނ. އަތޮޅުގެ އެންމެހައި ފުލުހުންވެސް ރައްޔިތުންނާއި މުއައްސަސާތަކާ އަދި ޖަމިއްޔާ ޖަމާއަތްތަކާ ގުޅިގެން، ރަށުގެ ވެއްޓަކީ އަމާންތަނަކަށް ހެދުމަށް މަސައްކަތްކޮށްދެއްވުމަށާއި، މާފަރުގެ ރައްޔިތުންވެސް ފުލުހުން ކުރަމުންގެންދާ މަސައްކަތުގެ، އެންމެކުރީ ސަފުގައި ފުލުހުންނާ އަތުގުޅާލައިގެން މަސައްކަތްކޮށްދެއްވުމަށް ސީޕީ އެދިވަޑައިގަތެވެ.
