އައްޑޫ ސިޓީން މިއަދުވެސް 37 މީހުން ކޮވިޑް19 އަށް ޕޮޒިޓިވްވެއްޖެއެވެ.
އައްޑޫ ހޮސްޕިޓަލުން އާއްމުކޮށްފައިވާ ތަފާސް ހިސާބުތަކަށް ބަލާއިރު މިއަދު އިރު އޮއްސި ހައެއް ޖެހުމާއި ހަމައަށް ފެނުނު 17 މީހުން ޕޮޒިޓިވްވެފައިވަނީ ހިތަދޫއިންނެވެ. އަދި 13 މީހުން ޕޮޒިޓިވްވެފައިވަނީ މަރަދޫއިންނެވެ. 5 މީހުން ޕޮޒިޓިވްވެފައިވަނީ މީދޫއިންނެވެ.
މީގެ ތެރޭގައި ހިމެނެނީ 14 ބިދޭސީންނާއި 23 ދިވެހިންނެވެ. މިއަދު އައްޑޫ ސިޓީން ޕޮޒިޓިވްވެފައިވާ 30 މީހުންނަކީ ކުރިން ޕޮޒިޓިވްވި މީހުންނާއި އެއްތާވި މީހުންނާއި ރަށުތެރެއިން ނެގި ސާމްޕަލް ތަކުން ޕޮޒިޓިވްވި މީހުންގެ އިތުރުން ފުލޫ ކްލިނިކަށް ދެއްކި މީހުންގެ ތެރެއިން ޕޮޒިޓިވްވި ބައެއް މީހުންނެވެ.
އައްޑޫގެ އަވަށްތަކަށް ބަލާއިރު މިވަގުތު އެންމެ ގިނަ މީހުން ޕޮޒިޓިވްވެފައިވަނީ މަރަދޫއިން ނެވެ. އެގޮތުން އެރަށުގައި އެކަނިވެސް ޕޮޒިޓިވް 106 މީހުން އެބަތިއްބެވެ. ހިތަދޫއިން ވަނީ 53 މީހުން ޕޮޒިޓިވްވެފައެވެ. މަރަދޫ ފޭދޫއިން 24 މީހުން ޕޮޒިޓިވްވެފައިވާއިރު ފޭދޫއިން ވަނީ 22 މީހުން ޕޮޒިޓިވްވެފައެވެ.
