ރާއްޖޭގެ ކުޅިވަރުގެ ދާއިރާގެ އުމްރާނީ ތަރައްގީގެ މަޝްރޫއުތައް ހިންގުމަށް އިންޑިއާއިން 40 މިލިއަން ޑޮލަރުގެ ލޯނު އެހީއެއްދީފިއެވެ.
މި ލޯނު އެހި ދީފައިވަނީ އެގްޒިމް ބޭންކު މެދުވެރިކޮށް ލައިން އޮފް ކްރެޑިޓް ފެސިލިޓީއެއްގެ ތެރެއިންނެވެ. މި ލޯނު އެހީގެ އެއްބަސްވުމުގައި ސޮއިކުރައްވާފައިވަނީ މިއަދު ފިނޭންސް މިނިސްޓްރީގައި ބޭއްވި ހާއްސަ ރަސްމިއްޔާތެއްގައެވެ. މި އެއްބަސްވުމުގައި ސޮއިކުރެއްވީ ފިނޭންސް މިނިސްޓަރ އިބްރާހީމް އަމީރެވެ. އަދި އެގްޒިމް ބޭންކުގެ ފަރާތުން ސޮއިކުރެއްވީ، އެ ބޭންކުގެ ޖެނެރަލް މެނޭޖަރ ނިރްމިތު ވެޑެވެ.
ސަރުކާރުން ހާމަކުރާ ގޮތުގައި މި 40 މިލިއަން ޑޮލަރުގެ ލޯނުއެހީގައި މާލެ ސަރަހައްދުގެ އިތުރުން އަތޮޅުތަކުގައި މިހާރު ހުރި ކުޅިވަރު ވަސީލަތްތައް ތަރައްގީކުރުމާއި އިތުރު ވަސީލަތްތައް ގާއިމުކުރުމުގެ މަސައްކަތް ކުރެވިގެންދާނެއެވެ. އެގޮތުން މި ލޯނު އެހީގެ ދަށުން ގައުމީ ފުޓްބޯޅަ ދަނޑު އިތުރަށް ތަރައްގީކޮށް، ގައުމީ ވޮލީ އަދި ބާސްކެޓް ބޯލް ކޯޓުތައް ތަރައްގީކުރުން ހިމެނެއެވެ. އަދި ބައެއް ރަށްރަށުގައި ސިންތެޓިކް ޓްރެކް ތަރައްގީކުރުމާއި، އިންޑޯ ސްޕޯޓްސް ކޮމްޕްލެކްސް ތަރައްގީކުރުންވެސް ހިމެނޭކަމަށް ސަރުކާރުން ވަނީ ހާމަކޮށްފައެވެ.
މި ލޯނު އެހީގައި އަތޮޅުތަކުގައި ހިންގުމަށް ހަމަޖެހިފައިވާ މަޝްރޫއުތަކުގެ ތެރޭގައި ހދ.ކުމުންދޫއާއި ތ.ކަނޑޫދޫގެ ޒުވާނުންގެ މަރުކަޒުގެ މަސައްކަތާއި ހދ.ކުޅުދުއްފުށި، ގދ. ތިނަދޫ، ފުވައްމުލައް ސިޓީ އަދި އައްޑޫ ސިޓީގައި ސިންޓެޓިކް ޓްރެކް ތަރައްޤީކުރުން ހިމެނެއެވެ. އަދި ކުޅުދުއްފުށީގައި އިންޑޯ ސްޕޯޓްސް ކޮމްޕްލެކްސްއެއް ތަރައްގީކުރުމަށް ފައިސާ ހަމަޖެހިގެން ދާނެކަމަށްވެސް ސަރުކާރުން ބުނެފައިވެއެވެ.
