ޑިއުޓީ މައާފް ކުރުމަށް އެދޭ ފޯމް ހުށަހަޅަން ނުޖެހޭގޮތަށް މޯލްޑިވްސް ކަސްޓަމްސް ސާރވިސް އިން ހަމަޖައްސައިފިއެވެ.
ކަސްޓަމްސް އިން ބުނީ އާއްމު ގަވާއިދުގެ 108 ވަނަ މާއްދާގެ (ނ) ގެ 4 ވަނަ ނަންބަރުގެ ދަށުން ކަސްޓަމްސްގެ ވެބްސައިޓުގައި ޢާންމުކޮށްފައިވާ ޑިއުޓީ މަޢާފުކުރުމަށް އެދޭ ފޯމު އަކީ އެކިއެކި މުއައްސަސާތަކުން ޑިއުޓީ މަޢާފުކޮށްދޭ މުދަލުގެ މައުލޫމާތު ފަސޭހަ ކަމާއިއެކު ކަސްޓަމްސް އަށް ހުށަހެޅުމަށްޓަކައި ތަޢާރަފްކުރެވިފައިވާ ފޯމެއް ކަމަށެވެ.
ނަމަވެސް ސަރުކާރުގެ އިދާރާއަކުން ޑިއުޓީ މަޢާފްކުރާ މުދަލުގެ މައުލޫމާތު ކަސްޓަމްސްއަށް ލިޔުމުން އަންގާތީއާއި، ޑިއުޓީ މަޢާފްކޮށް ސަރުކާރުގެ އިދާރާއިން ދޫކޮށްފައިވާ ސިޓީވެސް ކަސްޓަމްސްއަށް ހުށަހަޅަމުންދާތީ އާއި، މި ފޯމްގައި އެކުލެވޭ ހުރިހާ މައުލޫމާތަކީ ކަސްޓަމްސް ޑިކްލަރޭޝަން ހުށަހަޅާ މަރުޙަލާގައި "އަސިކުޑާ ވާރލްޑް" ޕްރޮގްރާމް މެދުވެރިކޮށް ކަސްޓަމްސްއަށް ޑިކްލެއާކުރާ މައުލޫމާތަށްވާތީ، ކަސްޓަމްސްއަށް ހުށަހަޅާ ލިޔެކިއުން މަދުކުރުމާއި ފޯރުކޮށްދޭ ޙިދުމަތް އަވަސްކުރުމުގެ ގޮތުން މިފޯމު ހުށަހަޅަންނުޖެހޭގޮތަށް ހަމަޖެއްސީ ކަމަށެވެ.
އެހެން ކަމުން މިމަހުގެ 15 ވަނަ ދުވަހުން ފެށިގެން، ޑިއުޓީ މައާފްކޮށްފައިވާ މުދަލަށް ޑިކްލަރޭޝަން ހުށަހަޅާއިރު ފޯމް ހުށަހަޅަން ނުޖެހޭނެ ކަމަށާއި މިގޮތަށް ހަމަޖެއްސި ނަމަވެސް، އެކިއެކި އެއްބަސްވުންތަކުގެ ދަށުން ޑިއުޓީ މަޢާފްވާ މުދަލަށް، އެ އެއްބަސްވުމުގެ ޑިއުޓީ މަޢާފްވާ އާޓިކަލް/ކްލޯސް ނަންބަރު ނުވަތަ އެކި މުއައްސަސާތަކުން ޑިއުޓީ މަޢާފްކުރާ މުދަލަށް އެ މުއައްސަސާއަކުން ދީފައިވާ ސިޓީ ނަންބަރު "އަސިކުޑާ ވަރލްޑް" ގެ އެމައުލޫމާތު އެންޓަރކުރުމަށް ކަނޑައެޅިފައިވާ ގޮޅީގައި ބަޔާންކުރަންޖެހޭގޮތަށް ހަމަޖެހިފައިވާތީ، ޑިއުޓީ މަޢާފްވާ މުދަލަށް ގުޑްސް ޑިކްލަރޭޝަން ފުރިހަމަކުރާއިރު، އެމައުލޫމާތު އެންޓަރކުރެއްވުމަށް ސަމާލުކަން ދިނުމަށް ކަސްޓަމްސްއިން ވަނީ އެދިފައެވެ.
