ޕްރޮޖެކްޓްތަކުގެ ނަން ބަދަލުކުރުމަކުން ވައުދެއް ނުފުދޭނެ ކަމަށް މާވަށު ދާއިރާގެ މެމްބަރު މުހައްމަުދ ސައީދު ވިދާޅުވެއްޖެއެވެ.
މެމްބަރު ސައީދު ކުރެއްވި ޓުވީޓެއްގައި ވިދާޅުވީ، ކުރީގެ ރައީސް އަބްދުﷲ ޔާމީންގެ ވެރިކަމުގައި ފަށާފައިވާ ތަރައްގީގެ މަޝްރޫއުތަކުގެ ނަން ބަދަލުކޮށްގެން، އެއީ މިސަރުކާރުން ކުރިކަމެއްކަމަށް ދައްކަން މަސައްކަތް ކުރިނަމަވެސް އެއީ ވެފައިވާ ވައުދު ފުއްދުންކަމަށް ނުވާނެކަމަށެވެ.
ސައީދު ވިދާޅުވީ، ރައްޔިތުންގެ ބޯހިޔާވަހިކަމަށް މި ސަރުކާރުން ވެފައިވާ ވައުދުތައް ފުއްދުމަށް އެއްވެސް މަސައްކަތެއް ކުރަމުންދާތަން ނުފެންނަ ކަމަށެވެ. ސައީދު ވިދާޅުވީ ހުޅުމާލޭގައި މިހާތަނަށް މިސަތުކާރުން އަމަލީ ގޮތުން ހިންގާ އެއްވެސް ބޯހިޔާ ވަހިކަމުގެ މަޝްރޫއެއް ކުރިއަށް ނުދާކަމަށެވެ. ސައީދު ވިދާޅުވީ ހުޅުމާލެ ފޭސް ދެއެއްގައި ރައީސް ޔާމީން ފެއްޓެވި ހިޔާ މަޝްރޫއު 2017 އިން ފެށިގެން ދަނީ ކުރިއަށް ކަމަށާއި، މި މަޝްރޫއުގެ ތަސައްވުރު އޮޅުވާލުމަށް ވިނަރެސްގެ ނަމަށް ބަދަލު ކުރުމުން އެ އޮޅުވާލެވެނީ ރައްޔިތުންނަށް ކަމަށެވެ.
ރައީސުލްޖުމުހޫރިއްޔާ އިބްރާހިމް މުހައްމަުދ ސާލިހު ވެރިކަމަށް ވަޑައިގަތުމަށްފަހު ވަނީ ގިނަ އަދަދެއްގެ ބޯހިޔާވަހިކަމުގެ މަޝްރޫއުތައް އިފްތިތާހު ކޮށްފައެވެ. ނަމަވެސް އަދި މިހާތަނަށް މީގެން އެއްވެސް ޕްރޮޖެކްޓެއްގެ އަމަލީ މަސައްކަތް ފެށިފައެއް ނުވެއެވެ.
