ދިވެހި ރާއްޖޭގެ ޝަރުއީ ނިޒާމު މިއަދު އޮތީ ނަޖިސްވެފައި ކަމަށާއި މުޅި ދިވެހިރާއްޖެއަށް މިވަނީ ޝަރުއީ ދާއިރާގެ ނަޖިސް ވަސް ފެތުރިފައި ކަމަށް ކުރީގެ ނައިބު ރައީސް ޑރ މުހައްމަދު ޖަމީލް އަހުމަދު ވިދާޅުވެއްޖެއެވެ.
އިދިކޮޅު ޕްރޮގްރެސިވް ކޯލިޝަން އިން މިރޭ ކާނިވާ ސަރަހައްދުގައި ކުރިއަށް ގެންދާ ޖަލްސާގައި ވާހަކަފުޅު ދައްކަވަމުން ޑރ ޖަމީލް ވިދާޅުވީ، އަދާވާތްތެރިން ކިތަންމެ ވަރަކަށް ވާހަކަތައް ފެތުރުއަސް 2023 ވަނަ އަހަރު ރާއްޖޭގެ ވެރިކަމަށް ޔާމީން ވަޑައިގަންނަވާނެ ކަމަށާއި އައްޑޫގައިވެސް އަދި ހުވަދޫގައިވެސް ބުރިޖު އަޅާނެ ކަމަށެވެ. އަދި އޭރުން އިސް ރަށްވެހިންނަށް ލިބޭ އިނާޔަތްވެސް ބޮޑުވެގެން ދާނެ ކަމަށާއި ޔުނިވަރސިޓީތައް އަޅުއްވާ އެއަރޕޯޓްތައް ތަރައްގީ ކުރައްވާނީ 2023 ވަނަ އަހަރު ރައީސް އަބްދުﷲ ޔާމީންގެ ރިޔާސަތުގައި ކަމަށެވެ.
ޖަމީލް ވިދާޅުވީ ކުރީގެ ރައީސް ޔާމީންގެ މައްޗަށް ކޮށްފައިވާ ފަސް އަހަރު ދުވަހުގެ ހުކުމް ސުޕްރީމް ކޯޓުން ބާތިލް ކުރައްވާނެ ކަމުގެ އުއްމީދު އެބައޮތް ކަމަށެވެ. އަދި ރައީސް ޔާމީންގެ މައްޗަށް މިހުކް ދެމެހެއްޓޭނެ އެއްވެސް ގޮތެއް ނެތް ކަމަށާއި ުޕްރީމް ކޯޓުން އަދުލްވެރިކަމާއެކު ރައީސް ޔާމީންގެ މައްސަލަ ބައްލަވާނެ ކަމަށް ޑރ ޖަމީލް ވިދާޅުވިއެވެ.
ޑރ ޖަމީލް ވިދާޅުވީ، އިދިކޮޅު ލީޑަރު ރައީސް ޔާމީންގެ މައްސަލަ ކޯޓުތަކަށް ވަނުމުން ކޯޓުތަކުގައި ތިއްބެވި ފަނޑިޔާރުންނަށް ހީވީ މުށިމަސް އައިނެއް ވަންހެން ކަމަށާއި އެ މައްސަލައިގެން ތެރެއިންވެސް ގިނަ ބަޔަކު މަގާމުގެ ކުރިއެރުން ހޯދިތަން ފެނުން ކަމަށެވެ. އަދި މިވެރިކަމުގައި ތަހުގީގު ކުރާ މީހާ އަށް އަންގާފައި ވަނީ ހަމައެކަނި އެންމެ މީހެއްގެ މައްސަލަ ތަހުގީގު ކުރަން ކަމަށާއި އަދި ދައުވާ އުފުލާ ޕީޖީއަށް އަންގާފައިވަނީވެސް އެންމެ މީހެއްގެ މައްޗަށް ދައުވާ ކުރުމަށް ކަމަށެވެ. އެހެންނަމަވެސް މިއީ މި ރާއްޖެ ފިޔަވައި ދުނިޔޭގެ އެހެން އެއްވެސް ގައުމެއްގައި ކަންހިގާ އުސޫލު ނޫން ކަމަށް ޖަމީލް ވިދާޅުވިއެވެ. މީގެ އިތުރުން ދިޔާ އެއްޗެހި ގެންދާ ވާހަކަ ދެއްކި މީހާ އާއި ވަޒީރަކު ތާށިވެފައި ހުރި ވާހަކައެއްވެސް އަޑު އިވިނގެން ދިޔަ ކަމަށާއި އެކަމަކު މީގެން އެއްވެސް މައްސަލައެއް ނުބެލި ރަތްލާޖެހި ވަގުން ތިބީ އޭސީ ކޮޓަރީގައި ކަމަށް ޖަމީލް ވިދާޅުވިއެވެ.
