ކުށްހުރި ގްރޭޑް އެކެއްގެ ދަރިވަރުންގެ ފޮތުގައި އިސްލާހުކުރި ސަފުހާ ތަތްކޮށްދިނުމަށް ނޭޝަނަލް އިންސްޓިޓިއުޓް އޮފް އެޑިއުކޭޝަން (އެންއައިއީ)އިން އެދިއްޖެއެވެ.
އެންއައިއީ އިން ނެރުނު ނޫސްބަޔާނެއްގައި ބުނެފައިވަނީ ތަދުރީސުލް ގުރުއާން ގުރޭޑް އެކެއްގެ ތިން ވަނަ ޗާޕުގެ ދެވަނަ ޔުނިޓްގެ 64 ވަނަ ސަފްހާގައިވާ ކުށް އިސަލާހުކުރުމަށް މިހާރު ސްކޫލްތަކަށް ފޮނުވާފައިވާ ކަމަށެވެ. އަދި އެ ފޮތް ބޭނުންކުރާ ހުރިހާ ފަރާތްތަކުން ވެސް ކީރިތި ގުރްއާނުގައި ވާގޮތަށް ނަބާ ސޫރަތް ކިޔަވައިދިނުމަށް ވަނީ އެދިފައެވެ. ޕްރިންޓު ކުރުމުގައި މި ދިމާވި މައްސަލައަކީ ކިހިނެއް ދިމާވި މައްސަލައެއްތޯ ބެލުމަށް މަސައްކަތް ކުރަމުން ގެންދާ ކަމަށް އެޑިއުކޭޝަން މިނިސްޓްރީން ވަނީ ބުނެފައެވެ.
ނޭޝަނަލް އިންސްޓިޓިއުޓް އޮފް އެޑިއުކޭޝަން ބުނީ ބައެއް އެހެން ގްރޭޑްތަކުގެ އިސްލާމް އަދި ގުރުއާން ފޮތްތަކުގައި ވެސް ކުށް ހުރިކަން ފާހަގަ ކުރެވިގެން އެކަމަށް ހައްލު ހޯދުމަށްވެސް މަސައްކަތް ކުރަމުންދާ ކަމަށެވެ. ފޮތްތަކުގައި މިފަދަ ކުށްތައް ފާހަގަ ކުރެވެން ފެށުމުން އާއްމުން ވެސް ދަނީ ސޯޝަލް މީޑިއާގައި ގިނަ ފާޑުކިޔުންތަކެއް ކިޔަމުންނެވެ.
